Hpakant Ginra Mung Shawa Nkau Myitkyina de Dingyang Matut Hprawng Yen nga

Hpakant ginra hta Myen Hpyen dap hte KIA dap lapran shani shagu hpyen masa shaja hkat taw nga ai majaw, Hpakant ginra masha n kau Myitkyina de hprawng yen taw nga ai re.

Ya ten Myen Hpyen dap maga na Seng Tawng ginra de htu shadut taw nga ai masa lam the seng nna, ginra masha wa n dai zawn tsun dan wa ai re.

“Mani gaw Myen ni San Chyoi Mawtawng Kawng kaw na Seng Tawng Lungsai Bum maga de man yawng na shamu wa na kumla pru ai, ngut na she Yuma Ever Myaw Chan na Myen ni mung Seng Tawng de shamu wa na masa nga ai, dai majaw Shanglawt ni mung, shawng de bai sit rai na hkap taw nga ai,” nga tsun dan wa ai re.

Myen Hpyen dap ni lai wa sai Shata kaw na, Sharaw Hka, Lagat Kawng maga de htu lung wa ai majaw, Sharaw Hka na mung shawa ni gaw, Lai wa sai Shata kaw Myitkyina de hprawng yen sai re.

N dai laman Myen Hpyen dap ni, San Chyoi, Maw Tawng dap shara ni hpe bai htim gasat wa ai the rau, Mashi Kahtawng San Chyoi mare hkan na mung shawa ni mung hprawng yen taw sai rai nga ai.

Ya ten Hpakant ginra na Hpyen yen mung shawa ni a masa lam the seng nna, Nawku Hpung magam gun Sara langai gaw KNG de n dai zawn tsun dan wa ai re.

“Hpyenyen the seng na gaw, anhte Hpakant ginra hta, wuhpung 5 hku na byin wa mai ai, langai gaw, tsep kawp n yen ai hpung ni, ngut na lahkawng ngu na gaw, Maw ga kaw sha gayin na yen na tsan ai de n yen ai hpung mi, ngut na langai bai rai jang gaw, Myitkyina de Nawku hpung a mahkyen the yen na, ngut na langai bai rai jang gaw, Myitkyina de gaw yen na rai tim Nawku Hpung ni masat ai shara kaw n wa nga ai, tinang Jinghku n ta wa machyu na hpung mi dai hku byin taw nga ai,” nga nna tsun dan wa ai re.

Ya ten Myitkyina de hprawng yen taw sai ni gaw, Mawmaw Layang, Sharaw Hka hte Mashi Kahtawng, San Chyoi Yuma hkan na mung shawa ni hprawng yen taw sai re.

Hpakant ginra hta Lai wa sai May Shata kaw na Myen Hpyen dap ni hpyen n gun kaba hte htu lung wa ai majaw, Majan laja lana byin taw nga ai gaw, dai ni ten du hkra byin taw nga ai re.

Majan byin taw ai majaw, Hpaji jawng ni hpe mung yawng pat kau ai majaw, Jawngma kanu kawa ni hku na Ma ni a hpaji lam hte seng na mung myit tsang ai lam ni nga taw ai hpe chye lu ai re.