Jinghpaw Mung hte Sagaing Jarit lapran na Bamauk Muklum hpe KIA PDF dap ni September 20 ya shani kaw na shang gasat zing lu sai rai tim, SNA dap ni mare makau grup yin hta naw dap jung nga ai majaw, majan matut byin taw ai lam chye lu ai.
Bamauk muklum hpe KIA PDF pawng hpawm dap ni maga na lai wa sai September 15 ya shani kaw na htim gasat hpang ai gaw, September 20 ya shana Muklum kata na dap shara n kau hpe gasat zing kau ai hpang, Muklum kata shang shara la lu wa ai lam re nga, Shawng lam hpyen magam gun langai KNG de n dai zawn tsun dan wa ai re.
“Myo kata na Byuha dap hte makau na dap kaji ni yawng hpe lu zing kau sai majaw, lu zing sai ga gaw rai nga ai, rai tim mung makau hkan SNA dap ni grai naw law ai, Shan the masha mahkawng na bai gasat wa na kun? Majan gaw naw byin na re.” nga tsun dan wa ai re.
Myo kata na dap shara ni hpe htim gasat ai ten, SNA dap ni hprawng htingnut mat wa ai majaw, ya n dai laman Makau grup yin kaw masha naw mahkawng taw ai masa lam re majaw gaw, Majan matut byin taw nga ai re lam chye lu ai.
Bamauk hpe NUG Asuya n pu PDF အမှတ် (၁) စစ်ဒေသ kaw na matsun woi awn gasat wa ai rai nna, dai majan hta, Sagaing ginra shagu na PDF ni hte ပကဖ၊ ပအဖ ni shanglawm gasat wa ai hpe chye lu ai.
September 15 ya shani kaw na shang htim gasat hpang wa ai n htoi 3 ya na ai the, Myo kata na SNA Dap shara 6 hpe shawng gasat zing madu ngut ai hpang, bat mi gasat ai hpang, Myo kata hpe zing madu la lu wa ai mung rai nga ai.
Ya ten Sam Hkyeng SNA dap ni Myo shinggan makau grup yin ni hta masha grai law naw mahkawng taw nga ai majaw, Majan matut na laja wa na masa nga ai lam, shawng lam hpyen magam gun ni tsun ai re.
မြို့သိမ်းစစ်ဆင်ရေး hta PDF dap maga na Bamauk the matut ai mawdaw lam ni yawng hpe pat kau na htim gasat zing madu wa ai lam mung rai nga ai.
Myo kata rawng nga ai Mung Shawa ni hpe mung SNA dap maga na gara de mung npru shangun ai n ta kaw sha rawng da shangun ai majaw, Laknak kaba Nbungli bawm ni hte Mung Shawa Si hkala lam ni mung nga taw ai hpe chye lu ai.
Ya ten Bamauk hpe PDF dap maga zep zi htim gasat shamyit kau ai lam n re sha, makau grup yin ni hta dap shara law law naw nga taw ai majaw, HPyen masa matut shaja hkat taw ding yang re lam mung chye lu ai.
