Lawng Hkang Bawm Yam Dap kaw wa du shatut nga ai Myen Hpyen hpung ni gaw, dai hpawt manap jau, Bawm Yam dap na Hpakant maga de lai lung wa taw nga ai majaw, Lawng Hkang Mare makau grup yin hta majan byin wa na masa nga ai majaw, Lawng Hkang, Maw Si Za mare hkan na mung shawa ni sadi maja na lam, lit nga ai ni tsun sadi jaw da ai re.
“Re, Dai hpawt manap jau pru wa masai da, dai ni pru wa jang gaw, Lay Pyin Sha It Yang, Lawng Hkang, Mawsi Za hkan Majan byin wa mai ai, dai majaw, Mung shawa ni yawng sadi maja nna, grai wa ahkyak kaba sha n rai yang, shinggan de pru hkawm ai lam n galaw na matu, tsun sadi jaw mayu ai nga,” Shawng lam hpyen magam gun hte ni nawn ai Nawku Hpung Ningbaw langai KNG de tsun wa ai re.
Dai Myen Hpyen hpung ni gaw, lai wa sai Laban ya shani Myitkyina Mogaung de na lung wa ai Myen hpyen hpung ni rai nna, September 14 ya shana Nam Ya mare de du shang wa ai rai nga ai.
Nam Ya mare kaw na Hpakant de lai lung wa ai ten, Kapmaw mare makau kaw KIA dap maga hkap shingla gasat ai lam nga wa ai hpe, shawng lam hpyen magam gun the ni nawn ai ni kaw na chye lu ai.
September 15 ya jahpawt Nam Ya mare kaw na lai lung wa ai gaw, Hpang jahpawt jau, Le Pyin Bawm Yam dap de shang mat wa ai mung rai nga ai.
Lay Pyin Bawm Yam dap kaw n htoi 3 ya ram hkring la ngut ai hpang, ya dai hpawt Hpakant Byuha kawng maga de bai lai lung wa taw ai masa mung rai nga ai.
Ya ten Hpakant ginra hta, Myen hpyen dap the KIA dap lapran hpyen masa shaja hkat taw nga ai zawn, shani shana laknak kaba ni hte gap gasat bun taw nga ai re.
