Seng Tawng Maw Shan Kaw Myen Hpyen Nbungli Bawm Wa Jahkrat
Mung Shawa Si Hkala lam n nga.
Mana Yup tung ten Myen Hpyen Dap Jet Nbungli hte Pound 500 kaba ai ngu maram lu ai nbungli bawm langai Seng Tawng Maw Shan lawk, Kawng San lung wa lam makau kaw, wa jahkrat bun da ai nga ginra masha ni tsun ai.
Myen Hpyen dap nbungli bawm wa jahkrat ai shara gaw, ရတနာစိမ်း Company wang shara kaw re majaw, masha si hkala ai lam gaw n nga ai rai tim, dai wa hkrat ai shara kaw tsawm ra lawk rai byin ai nga, Seng Tawng ginra masha langai KNG shiga de tsun dan wa ai re.
“Jet Nbungli hte re, Pound 500 kaba ai nbungli bawm re ngu na gaw jawm maram nga ga ai, dai grup yin kaw gadai n nga na she rai sai. Masha gaw hpa n ra ai, dai wa hkrat ai shara kaw chyawm, Hka Nawng kasha zawn she byin hkra lawk ai byin taw ai” nga tsun dan ai re.
September 17 ya shana de hkying 4 aten daram hta sha mung, Hpakant Myen Hpyen Byuha kawng maga de na gap dat ai laknak kaba si, Seng Tawng Lawk masum na mung shawa dum n ta kaw wa hkrat hkra ai majaw, asak 9 ning re ai ma kaji langai asak si hkrum wa nna, laga Ma marai 4 mung hkala sawng wa ai hpe chye lu ai.
Seng Tawng ginra yawng hpe KIA PDF dap ni lai wa sai 2024 ning Lucky Men Hotel majan ngut ai hpang kaw na, tsep zi zing madu da ai hpang, Myen Hpyen dap ni laknak kaba ding yang bai gap bun wa taw nga ai lam mung rai nga ai.
Ya ten Myen Hpyen dap ni Seng Tawng maga de hpyen man lahkawng hku na htu shadut htim gasat taw nga ai majaw, majan laja laba gap gasat taw nga ai gaw, Myen ni Mana maga de San Chyoi Hpara kawng kaw lu dung mat sai lam ginra masha ni tsun dan ai kaw na chye lu ai.
Myen Hpyen dap maga de na, laknak kaba Drone the ladu lai gap gasat htim lung wa ai majaw, KIA dap maga na San Chyoi hte Maw Tawng dap shara lahkawng hpe mani gan yen tawn kau da ya sai re.
Dai dap shara lahkawng hpe yen kau da ya ai hpang, Myen ni Seng Tawng maga de nbungli hte bai wa gap gasat bun wa ai lam mung rai nga ai.
Ndai laman Myen Hpyen dap maga na gaw, Hpakant ginra de hpyen n gun jat bang nga ding yang rai nna,shan hte tat sum kau da ai ginra yawng hpe bai gasat zing la nna, ra lata poi galaw na matu hkyen shakut taw nga ai lam mung rai nga ai.
KIA dap maga na mung, Mashi Kahtawng Kyihpyi bum kaw na Myen Hpyen byuha kawng maga de 107 လျှော့တိုက်ဒုံး ni hte gap bun ai lam galaw nga ai nga, dai ginra na amyu shayi langai KNG de tsun dan ai re.
