Manmaw Hpri Gang Dap (5014) hte Nbungli Pa makau na Hk.L.Y (236) Dap shara hpe bai tat sum
Manmaw Hpri Gang Dap (5014) Dap hte Nbungli Pa makau na Hk.L.Y (236) Dap shara hpe Pawng hpawm dap maga mana de hkying 4 ten daram kaw na gan htingnut yen kau da ai lam teng ai nga, Dukaba Naw Bu KNG shiga dap de tsun shateng ai re.
Lai wa sai August praw 4 ya shani kaw na, Myen Hpyen dap ni Manmaw ginra shara shagu de Hpyen Man 7 hku na bai htu shadut htim gasat wa ai hpang, KIA hte Pawng hpawm dap ni htim gasat zing madu da ai Hpri Gang Dap (5014) hte Nbungli Pa makau na Hk.L.Y (236) Dap shara hpe Myen ni bai gasat zing la kau lu sai lam teng ai nga, Dukaba Nhpang Naw Bu KNG shiga de n dai zawn tsun shateng wa ai re.
“Manmaw maga na shiga gaw, September 11 ya shana maga hkying 4 aten daram hta, သံချက်ကာတပ်ရင် langai hte Hk.L.Y 236 dap shara lahkawng hpe Myen ni bai gasat zing la kau lu ai lam teng ai lo,” nga nna tsun shateng wa ai re.
Myen Hpyen Hpung ni Hka Sanghpawli du lung wa ai hpang kaw na Hpyen n-gun kaba hte bai htim gasat wa ai majaw, ya na zawn tat sum kau wa ai masa re lam mung matut tsun ai re.
Myen Hpyen Hka Sanghpawli hta Laknak kaba, madang tsaw Drone ni, Hpyen n gun ni bai jat lung wa re lam ni a majaw, ya na zawn bai htingnut kau ya ra ai lam ni byin wa ai re lam chye lu ai.
Myen Hpyen hpung ni Hka Sanghpaw du ai hpang, Manmaw ginra kata Hpyen Man 7 hku htu shadut htim gasat wa ai mung rai nga ai.
Manmaw Dakkasu jawng kaw rawng nga ai Myen Hpyen စစ်ကြောင်း hpung mi gaw, Nam Hpa lawk maga de laja lana htu gasat wa ai majaw, Nam Hpa Mahkrai pawt kaw dung ai Pawng hpawm dap ni lai wa sai bat hta yen kau da ra mat ai re.
Myen Hpyen dap ni n dai laman Manmaw Nbungli Pa makau grup yin hte mani tat sum kau ai shara ni de hpyen man 3 hku na laja lana htu shadut htim gasat wa ai lam, Myen Hpyen Shiga hta tsun da ai re.
Ya tat sum kau ai Hk.L.Y (236) hpe KIA the pawng hpawm dap ni lai wa sai February 18 ya shani htim gasat padang dip la lu ai shara rai nna, Hprigang dap (5014) hpe gaw, January 25 ya shani padang dip zing la lu wa ai rai nga ai.
Ya na zawn padang dip zing da lu ai shara ni hpe Shata kru na ai hpang Myen ni hpyen n gun kaba hte bai htim gasat wa ai majaw, tat sum kau ai lam mung rai nga ai.
Ya ten Manmaw Nbungli Pa chyen mi hte ခလရ(၂၃၆)၊ အမတ (၃၆၆)၊ (၅၀၁၄) တင့်ကားတပ် ni hpe Myen ni bai gasat zing madu da lu sai mung rai nga ai.
