Sharaw Hka de Htu Lung Wa ai Myen Hpyen Hpung Hpe KIA hkap shingla gasat
Hpakant Sharaw Hka, Lagat Kawng maga de htu lung wa ai Myen Hpyen hpung ni hpe KIA PDF dap ni hkaraw de hkrau la nna, wang matep gap gasat ai hta, Myen Hpyen dap maga si hkala law wa ai lam chye lu ai.
Dai zawn Myen hpyen dap maga si hkala law wa ai majaw, shana maga de n bungli shaga na, bawm sa jahkrat bun ai rai tim, Myen hpyen dap maga na si mang ni hpe dai ni du hkra rai n lu sa hta shi ai nga, Magam gun langai KNG shiga de n dai zawn tsun dan wa ai re.
“Mani September 9 ya shana de Hpakant Sharaw Hka,ညောင်ပင်ကုန်း de htu lung wa ai Myen Hpyen hpung ni hpe, Lagat kawng a hkaraw de hkrau bang la na, wang matep gap gasat ai kaw Myen ni ram ram machyi mat ma ai, dai majaw nbungli shaga na bai wa gap, n bungli the wa gap ai rai tim, dai ni du hkra si mang ni n lu hta shi ma ai,” nga tsun dan wa ai re.
Mana de hkying 2 ten daram hta Myen Hpyen nbungli 2 hte Seng Tawng Ninghtawn San Chyoi mare Hpungkyi jawng shingdu maga de bawm wa jahkrat bun kau da ai lam nga ai hpe chye lu ai.
Ndai laman Myen hpyen hpung ni Seng Tawng maga de htu shadut htim gasat taw ai majaw, San Chyoi, Maw Tawng mare makau grup yin ni hta, gap gasat hkat taw nga ai re.
Sharaw Hka, Lagat Kawng de htim gasat taw nga ai Myen Hpyen hpung ni gaw, numdaw lahkawng lang ngu na lung wa ai hpyen hpung ni rai nna, ya Seng Tawng de bai htu taw ai Myen hpyen hpung ni gaw, numdaw 3 lang ngu na htu lung wa ai Myen Hpyen hpung ni rai nga ai.
Ya ten Hpakant ginra hta Myen HPyen hpung ni Hpyen man masum hku na htim gasat taw nga ai rai nna, HPyen man langai gaw, Mawwan kaba maga de htu taw nna, Hpyen Man lahkawng hku na gaw, Sharaw Hka, Lagat Kawng, Sut Bum maga de htu taw ai rai nna, ya hpang jahtum lung wa ai hpyen man ni gaw, Seng Tawng maga de htu na matu San Chyoi, Maw Tawng mayan ni hta htu shadut taw ai mung rai nga ai.
Hpakant ginra hta ya na zawn hpyen masa shaja hkat wa ai majaw, HPaji jawng ni yawng hpe lai wa sai bat kaw na pat tawn ai gaw, n dai bat hta mung matut na naw pat da na lam chye lu ai.
Hpakant ginra de lai wa sai April Shata kaw na Myen ni bai htu lung wa ai majaw, Majan ding yang gap gasat hkat nga ai gaw, dai ni ten du hkra rai nga ai.
