Monyin Muklum kata Mytel line kaw na Internet hpe VPN Madin hte Mai Jai Lang Nga
Monyin ginwang kata, Mytel Operater Phone line kaw na Internet hpe VPN madin hte mai jai lang taw sai lam, Monyin ginra masha ni kaw na chye lu ai.
Monyin muklum n tsa, August Shata htum ai hpang kaw na, Mytel Phone Internet line hpe VPN madin hte ding yang bai lu lang taw sai nga, Monyin ginra masha langai KNG de n dai zawn tsun dan wa ai re.
“Ndai kaw Mytel Internet lu ai bat mi daram rai sai. VPN hte ding yang na mai yu taw ai, shawoi hkan gaw, Phone mai set ai, Internet n lu ai, rai tim n dai laman gaw, Internet mung VPN the mai lang wa ai nga nna,” tsun dan wa ai re.
Phone Internet line gaw, Monyin muklum kata kaw sha naw lu ai rai nna, laga myo shinggan de gaw rai n lu shi ai lam chye lu ai.
Monyin muklum kata lai wa sai July Shata kaw na Phone line lu hpang wa ai rai nna, n dai September Shata kaw nna gaw, Internet line ni bai lu wa ai mung rai nga ai.
Myen Hpyen dap gaw, Jinghpaw mung ting hpe, lai wa sai 2024 ning June Shata kaw nna, Phone Internet line yawng hpe dan di kau ya ai rai nga ai.
Monyin Muklum kata hta, Mytel, MPT, Phone line ni lu taw sai rai tim, laga ginwang ni hta gaw, hpa Phone Internet line mung rai n lu shi ai re.
