Myen Hpyen Laknak kaba a majaw, Mung shawa marai 10 jan Hkala hkrum wa
Hpakant Myen Hpyen Dap Tatma kawng na gap dat ai laknak kaba si Seng Tawng mate maga de wa hkrat ai majaw, Mung shawa marai 10 jan hkala hkrum wa ai lam chye lu ai.
September 9 ya jahpawt maga hkying 12 chyen ten kaw, Hpakant Tatma kawng na gap dat ai laknak kaba si Seng Tawng mare hte Bazan Chauk mare ni hta wa hkrat kapaw ai majaw, Mungshawa dum n ta hkra hten ai lam ni law wa ai sha n ga, mung shawa ni mung hkala hkrum wa ai re.
Tatma kawng na gap dat ai laknak kaba si Seng Tawng Lawk (3) hte Bazan Chauk mare kaw wa hkrat ai majaw, mung shawa marai 10 jan hkala hkrum wa ai lam hte seng nna, ginra masha langai KNG shiga dap de ndai zawn tsun dan wa ai re.
“Mana Yuptung ten kaw Hpakant Myen HPyen Tatma kawng na laknak kaba 7 lang gap bun ai,Seng Tawng mare lawk (3) hte Ba San Chauk mare kaw wa hkrat ai, wa hkrat ang ai dum n ta nig aw Jan, မြင့်မြင့်သန်း a nta wang kaw 2 , Ngwi pyaw lawk Miwa laika sharin jawng shawng hta langai, . Seng Tawng lawk (4) Slg, လန်းချိန် a nta wang kaw langai, Seng Tawng lawk (3) Slg, Maung Oo a dumsu lawng langai, Seng Tawng lawk (3) Hpaji jawng wang langai, Seng Tawng lawk(3) Ja Uru Lu Sha Seng makau kaw langai, laknak kaba si yawng pawng 7 lang wa hkrat kapaw ai,” nga tsun dan wa ai re.”
Laknak kaba si the hkra hkala hkrum wa ai mung shawa ni gaw, Jan, မြင့်မြင့်သန်းAsak-45 ning, Slg Win Maung asak (50) ning, Slg, ခိုင်မြဲဦး Asak – 39 ning, Slg, လန်းချိန် Asak – 40 ning, Jan, ဖြူဖြူဝင်း Asak – 42 ning, Mg Myo Asak -32 ning, Slg, Zaw Win Asak – 45 ning ni hkala hkrum wa ai hpe chye lu ai re.
Myen Hpyen dap ni ya na zawn, laknak kaba ni gap shadam bun wa ai majaw, Seng Tawng mare masha n kau, tinang man ang ai shara ni de hprawng yen ai ni mung nga taw sai lam hpe chye lu ai.
Dai na de hkying 2 aten daram hta San Chyoi mare shingdu kyuhpyi bum maga de Myen Hpyen nbungli hte 2 lang bawm wa jahkrat bun kau da ai lam nga ai hpe matut chye lu ai.
Dai na maga de Sharaw Hka, Lagat Kawng maga de Myen ni htu lung wa ai majaw, majan laja lana matut gap gasat hkat wa ai lam nga ai hpe chye lu ai re.
Ya ten Myen Hpyen dap ni San Chyoi, Seng Tawng maga ni de laja lana htu shadut taw nga ai rai nna, San Chyoi hpe n lu yang lu hkra htim gasat wa na masa nga ai lam ginra masha ni tsun maram da ai re.
