Myitkyina Nawng Nang Mare, na asak 8 ning re ai ma kaji langai, September praw 2 ya shana kaw na mat mat ai hpe, 3 ya na ai hpang, n ta makau na Kawa shalawng hta si taw ai hpe sa mu ai lam, n ta masha hte ni nawn ai ni KNG shiga dap de tsun dan wa ai re.
Dai Ma gaw Nawng Nang Mare, Lawk (2) na, Slg Labu Naw Lat hte Jan Uk Doi yan ai kasha Shy Labu Merry Nang Zin Asak (6) ning gaw, September praw 2 ya shana de hkying 5 hte hkying 6 aten daram kaw na mat mat ai rai nga ai.
Dai ma gaw Nawng Nawng Mare masat (4) lawu tsang jawng hta jawng lung laika sharin nga ai jawng num kasha rai nna, Kawoi dwi hte hkrai sha dum n ta nga ai rai nna, Kanu yan Kawa gaw, Sammung maga de gumhpraw tam hkawm ai lam chye lu ai re.
Kawoi dwi the hkrai nga taw ai ten, September praw 2 ya shana maga kaw na dum n ta de n pru wa mat ai majaw, n’ta masha ni lawu lahta makyin Jinghku ni kaw, hkan tam san hkawm yu ai rai tim n mu ai majaw, Onlin n tsa hkan masha mat n dau ai lam ni galaw wa ai nga, htingbu n ta na, hpung Sara magam gun wa gaw, KNG shiga dap de ndai zawn tsun dan wa ai re.
“anhte tam ai masum ya rai wa tim n mu ai majaw, n dai laman Myitkyina ginra kaw ma mat ai lam ni grai garu wa ai majaw, ma lagu ai ni ကလီဇာ lagu ga shaw la na matu rim woi mat ang sam sai ngu, Line n tsa kaw masha mat ai lam ndau ai rai nga ai, anhte dai hku na tam nga yang she n ta makau na Kawa sumwup kaw si taw ai hpe dai kaw sun galaw ai ni shawng sa mu ai, dai kaw sun galaw ai wa gaw sun sun nga manam ai majaw, Nga si taw sam ai kun nga na hkan tam yu yang, hpun palawng hpe shawng mu ai, dai kaw si taw ai majaw, mare masha ni hpe bai shaga rai na sa jawm yu yang gaw, dai kaw si taw ai rai taw,” nga tsun dan wa ai re.
Dai ma hpe sa mu ai hta, Labu ni yawng raw da nna, Lagaw lakrang taw ai masa hpe yu yang, roi rip da ai masa nga ai lam ginra masha ni tsun maram da ai re.
“Si taw hpe sa yu yang, labu raw da nna, lagaw lakrang da ai hpe yu yang, mazut roi rip da ai masa sa ai, ngut na mung shadai makau kaw n hkyi galun hkang hte pu ni ma male taw ai nga,” Htingbu Sara wa matut tsun dan ai re.
Dai ma si taw ai hpe, yawng yet manam taw sai majaw, Tsi rung ရင်ခွဲရုံ de mung n sa sai sha, mare masha ni yawng jawm na dai mu hta ai shani hta sha lup makoi kau sai lam chye lu ai.
Dai ma hkum tsawp moi mang hpe September 5 ya shana maga hkying 1 chyen ten daram hta sa mu ai rai nna, dai sa mu ai ten, hkum hkrang ni yet taw sai lam hpe chye lu ai.
Myitkyina muklum kata n dai zawn, ma mat ai lam ni jahkring hkring byin nga ai zawn, lagu lagut damya mya ai lam ni mung lani hte lani grau grau sawng wa taw nga ai re.
Mani Laban ya shani ka-ang aten daram hta mung Myitkyina Jinghpaw Wang lawk kaw, Damya mya taw ai ramma shabrang marai 5 hpe, mungshawa ni jawm nna lu rim wa ai hpe mu lu ai re.
