Manmaw Kaw Na Yu Wa Ai Myen Hpyen Hka Sanghpawli lam lapran hkap shingla gasat hkrum ai hta langai hten
Dai hpawt Manmaw kaw na yu wa ai Myen Hpyen Hka Sanghpawli ni hpe Pawng hpawm dap maga Sin Hkan Mare makau kaw hkap shingla gasat ai hta Myen Hpyen Hka Sanghpawli langai hkra hten mat ai majaw, Shwegu rai n du lu kaw hkring taw ai lam chye lu ai.
Manmaw kaw na Mung Shawa arung arai lagu na htaw yu mat ai Myen Hpyen Hka Sanghpawli hpe Pawng hpawm maga hkap shingla gasat ai hta hkra hten mat ai masa lam hte seng na, shawng lam hpyen magam gun langai KNG shiga de n dai zawn tsun dan wa ai re.
“Re ai, dai hpawt Manmaw kaw na yu wa ai Hka Sanghpawli hpe anhte maga na ni Sin Hkan rai n du lu shi kaw hkap gap gasat ai, Sanghpaw langai hkra hten mat ai, dai sanghpaw kaw lawm ai Myen Hpyen la n kau mung si hkala ai lam nga ai, dai majaw dai sanghpaw ya ten Shwegu rai n du lu kaw wa hkring taw nga ai,” nga tsun dan wa ai re.
Ndai laman Myen Hpyen dap ni Manmaw Htawng masha ni hpe shana de shagu htawng chyinghka hpaw ya nna, Mung shawa dum n ta hkan na arung arai hkan lagu hpai shangun na sanghpaw n tsa hpai mara shangun taw ai lam ni nga taw ai hpe, shawng lam magam gun ni kaw na chye lu ai re.
Myen Hpyen dap maga Manmaw ginra kata na mung shawa arung arai law law hpe lagu htaw lang nna, yu mat wa ai lam mung rai nga ai.
Hka Sanghpawli yu mat wa ai hka lam ding yang hta mung Y12 nbungli hte shim lam la ya nna, yu mat wa ai lam chye lu ai.
Lai wa sai July Shata hta Mandalay kaw na Myen Hpyen Hka Sanghpawli 23 Jinghpaw mung de man yawng lung wa ai gaw, Sanghpaw 4 hpe Katha kaw gan jahkring ngam kau da ai rai nna, dai hka Sanghpawli hpung ni mung Manmaw maga de man yawng lung wa na matu hkyen shajin taw ai lam chye lu ai.
