Myitkyina Muklum kaba kata na dinghkrai Hpaji jawng n kau, ni hta gumhpraw shagyeng katut nna, gumhpraw n jaw jang, Bawm kapaw jahkrit ai lam ni jahkring hkring byin taw ai lam, Myitkyina ginra masha ni kaw na chye lu ai.
Bawm kapaw jahkrit ai lam rai n galaw shi yang, gumhpraw shagyeng hpyi ai, gumhpraw n jaw jang, laika the bai jahkrit sharim ai, dai hpang Jawng makau hkan Bawm ni bai kapaw dan ai lam ni galaw ai nga na tsun dan ai re.
Ya du hkra rai yang, dai zawn bawm kapaw jahkrit hkrum ai dinghkrai hpaji jawng ni gaw, Pyi Hein, IELTS, ALL STAR ding hkrai jawng ni rai nna, ya na zawn bawm kapaw jahkrit hkrum ai lam the seng nna, Mying n tsun mayu ai Saranum langai gaw, KNG shiga de n dai zawn tsun dan wa ai re.
“Anhte n dai dinghkrai jawng ni gaw, n jaw tim n mai ai le, hpa majaw nga yang jawngma law law the nga ra ai, lama ma byin mat yang n loi ai le, jawng ma ni a shim lum lam hpe tsang ra ai, dai majaw gaw, jahkrit sharim ai ni mung, hpaji jawng ni hpe gaw loi ai ngu masa hte grau galaw sam ma ai,” nga na tsun dan wa ai re.
Ya na zawn, dinghkrai Hpaji jawng ni hpe Bawm sa kapaw jahkrit dan ai lam ni a majaw, masha hkra hkala ai lam gaw rai n nga shi ai rai tim, wut shakum jawng n ta ni loi li hkra hten ai lam ni gaw nga ai lam chye lu ai.
Ya na zawn, jahkrit sharim nna, gumhpraw masu hta sha hkawm ai gaw, PDF ni re nga nna, Jahkrit sharim hkrum ai nit sun ai lam the seng nna, Myitkyina Myo kata shamu shamawt nga ai, NBPDF na lit nga ai ni hpe KNG maga san sagawn yu yang ndai zawn tsun dan wa ai re.
“Ndai zawn galaw ai gaw, Kyang Laban ai ni galaw ai lam she re. Myen Hpyen dap ni kaw na Mung shawa shada lapran hta daw hka mat hkra sumprat dawk mayu ai majaw, galaw ai lam mai byin ai, anhte PDF, KIA, KG ni gaw dai hku n galaw ai,” nga nna, NBPDF na lit nga ai magam gun langai KNG shiga de tsun dan ai re.
Lama mung shawa ni hpe dai zawn jahkrit sharim gumhpraw hpyi ai lam ni nga yang, NBPDF dap de mung shawk shawn mai ai lam matut tsun da ai re.
Dai zawn gumhpraw masu shagyeng hpyi ai ni hpe lai wa sai 2022 ning hkan PDF dap maga na lu rim san jep yu ai hta, Pyithutsit hte htawng hkan na pru wa ai lagu lagut damya ni mung lawm ai lam tsun dan da ai re.
Lai wa sai ten ni hta gaw, Bungli madu, gat seng ni hpe sha gumhpraw masu hpyi ai rai tim, n dai hpang daw de gaw, dinghkrai jawng ni hpe mung, gumhpraw masu hpyi ai lam ni nga taw ai hpe mu lu ai re.
Ya na zawn dinghkrai hpaji jawng ni hpe yaw shada na, ndai zawn galaw wa ai lam hpe Jawngma kanu kawa ni myit tsang taw nga ai re.
