Langse Ginra hta Lisu Amyu Shayi langai hpe KIA magam gun ni adup gayet wa ai mang hkang hpe Miwa gumhpraw Yuan Mun mi hte shada prinem
Langse Ginra hta Lisu Amyu Shayi langai hpe KIA magam gun ni hku nna, adup gayet wa ai mang hkang the seng nna, Miwa gumhpraw Yuan mun mi hte shada prinem hkat sai lam chye lu ai.
August 29 ya shani, Lang Se Jamaw na Lu sha seng langai hta Ja htu n hkun kaw shat shadu ai amyu shayi langai hte Langse ginra lit nga ai Du Up Lahpai Ja Li Awng yan gaw ga li ga law manghkang byin wa ai hta Amyu shayi maga na, Dukaba hpe nlung hte baw kaw kabai bun ai majaw, Dukaba a na kaw hkra hkala mat ai lam nga ai nga, KIA maga na tsun ai re.
“Dai Lisu Num shawng Dukaba hpe nlung hte kabai ai, Na pawt kaw hkra ai majaw 4 lang chywi kau ra ai, dai num shawng Dukaba hpe gabai ai majaw, Dukaba hku na mung loi bai sharin shaga dat ai majaw, kasu kabrawng byin wa ai rai nga ai,” nga dai ginra na Salang kaba langai KNG de tsun dan wa ai re.
Dai hpang, dai amyu shayi hpe Dukaba Lahpai Ja Li Awng hte shi a ra na ni gaw bai adup gayet nna, sharin shaga ai nga ga baw hte ၆ ပေါက် kaw mung bang shareng wa ai lam ni galaw wa sai lam ginra masha ni tsun ai re.
Dai zawn,Gali galaw byin ai hpe pri nyem ai hku n hparan ai sha, amyu shayi langai hpe adup gayet wa ai majaw, August 30 ya shani Langse ginra amyu shayi n kau n – gun madun ai lam mung galaw wa ai re.
Dai zawn, n gun madun wa ai kaw du hkra byin wa ai hpang, Dai Langse na lit nga ai Shanglawt salang ni gaw manghkang hpe bai hparan wa ai hta, adup gayet hkrum ai amyu shayi wa hpe, tsi manu nga nna, Miwa gumhpraw Yuan Mun mi jaw nna, shada prinem hkat sai lam chye lu ai re.
