Hpakant Ginra kata Myen Hpyen Dap maga ndai laman hkawm sa hkawm wa lam ni hpe ladu lai san jep taw nga nna, ndai n htoi 3 ya laman ramma ni rim hkrum ai marai 35 du sai lam chye lu ai.
August 28 ya shani hta Lawng Hkang Pan Tin Mahkrai hta ramma marai 10, 29 ya shani Hpakant Uru Hka mahkrai n tsa hta ramma marai 15, 30 ya shani Mashi Kahtawng na ကျောက်စိမ်းသူ lusha seng hta shangai n htoi poi galaw ai kaw sa shang lawm ai ramma marai 10, 31 ya shani hta Hpakant သုံးဘီးဂိတ် kaw marai 3 rim hpe rim woi mat ai re.
August 31 ya shani hta sha, Hpakant Lungseng Gat Lawk wang makau na Sengke gram seng kaw na marai 4 hpe mung Mawdaw 2 the rim woi mat ai lam ginra masha langai KNG shiga dap de ndai zawn tsun dan wa ai re.
“Ndai laman shani shagu ngu na rim taw nga ai, n kau hpe gaw rim woi mat nna, bai dat ya ai, n kau hpe gaw tsep kawp n dat ya mat ai, 29 ya shana lusha seng kaw na rim woi mat ai marai 8 hpe gaw bai dat ya nna, marai 7 hpe gaw, dai ni du hkra tsep kawp n dat ya mat ai re.” ng ana tsun dan wa ai re.
Ndai laman rim woi hkrum ai hta Naing Min Htet ngu ai PDF magam gun mung lawm mat wa ai lam chye lu ai.
Naing Min Htet hte Manang marai 3 hpe KIA magam gun hpe gap sat kau da nna, Myen Hpyen dap de hprawng shang mat wa ai re lam, PDF magam gun ni tsun ai re.
Naing Min Htet Myen Hpyen dap de shang mat wa ai hpang kaw na Hpakant ginra hta, PDF the matut mahkai nga ai ni rim woi hkrum ai lam jahkring hkring byin nga ai re.
“Naing Min Htet shang mat wa ai hpang kaw na, jahkring hkring rim hkrum taw nga ai, n dai n htoi 3,4 ya laman hta sha marai 50 ram du wa sai,” nga Hpakant ginra na CDM magam gun langai KNG shiga de tsun dan wa ai re.
Ya ten Hpakant ginra hta Myen Hpyen dap ni lam numbraw shara shagu hta shara la da nna, lai sa lai wa mung mare masha ni hpe jahkring hkring san jep ai lam ni galaw nga ai re.
