Manmaw de Majan sum machyi law wa ai majaw, Waimaw maga de Hpyen man hpaw wa ai nga, Hpyen Masa yu maram ai ni tsun

Ndai laman Manmaw hpe Myen ni laja lana bai htim gasat wa ai hta Myen Hpyen dap maga sum machyi law wa ai majaw, Waimaw hkran maga de majan man bai hpaw wa ai lam, Jinghpaw Mung Hpyen masa yu maram nga ai ni tsun ai re.

Waimaw Lamyang mare maga de Myen Hpyen dap maga Nbungli bawm n dai lahkawng ya shani shagu sa jahkrat bun nga nna, lagaw dap ni hku na mung htim gasat ai lam ni galaw wa ai lam, shawng lam hpyen magam gun ni tsun ai re.

Waimaw Lamyang de Myen Hpyen dap ni nbungli the bawm sa jahkrat bun wa ai hpang, Myitkyina maga kaw na mana ting mung laknak kaba gap bun wa ai lam matut chye lu ai re.

Ya na zawn Waimaw Lamyang mare de majan bai shabyin wa ai lam the seng nna, Hpyen masa yu maram ai, Salang langai gaw, “ Ya hte Manmaw hpe grai bai shakri wa ai hta, ram ram sum machyi sam ma ai, ya Waimaw maga de bai majan baw wa ai ngu gaw, ngai maram ai hku nga yang, Hpyen lagaw gang ai ngu na mu ai,” nga tsun ai re.

Waimaw Lamyang Muk Chyik maga de Myen Hpyen dap ni lagaw lam hku na bai shamu lung wa ai hpe, KIA maga hkap shingla gasat ai hta, sum machyi lam ni law wa nna, Nbungli the bawm wa jahkrat bun ai sha n ga, Myitkyina hkran maga de na mung laknak kaba ni hte shana ting gap bun wa ai re.

Lai wa sai 2024 ning March Shata kaw nna, Wai Maw Gai wang Shara law malawng hpe KIA the PDF pawng hpawm dap maga htim gasat zing madu kau ma ai rai nga ai.

Waimaw Ginwang kata hta , Waimaw (58) Hpyen dap the Wuyan Pyithutsit, Balik ni hpe sha ngam tawn da nna, laga dap shara yawng hpe htim gasat zing madu kau ai rai nga ai.

Waimaw Ginra yawng hpe htim gasat zing madu kau ai hpang, Myen maga hpyen shamu shamawt ai lam ni bai galaw wa ai majaw, Waimaw Washawng lam kaba ding yang hpyen masa shaja hkat taw nga ai gaw, dai ni ten du hkra re lam chye lu ai.

Gap dat hkring dat rai na hpyen masa shaja hkat taw ai ram ram na sai rai tim, mani kaw na kalang bai ngoi hpang wa ai re lam shawng lam hpyen magam gun wa tsun ai re.

Mani lani mi laman hta sha Jet Nbungli langai hte 4 lang daram da bat gayin nna, bawm jahkrat bun kau da ai re lam chye lu ai.

Ndai laman Myen Hpyen dap ni Manmaw de sum machyi lam ni law wa ai majaw, Waimaw hkran maga de mung hpyen lagaw gang ai hku na Hpyen shamu shamawt lam ni bai galaw wa ai masa re nga, Hpyen masa yu maram ai ni tsun tawn ai re.