Monyin Ginwang kata Sam Hkyeng SNA Dap ni Hpyen Rim lahkawn nga ai majaw, Ginra masha ni Yak hkak hkrum nga

Monyin Ginwang kata hta, Sam Hkyeng SNA dap ni maga Hpyen rim lahkawn ai lam a majaw, ginra masha ni hkauhting hkauna galaw lu galaw sha na yak hkak taw nga ai lam chye lu ai.

Myen Hpyen Dap npu kaw nga ai, Sam Hkyeng SNA dap nig aw Monyin mare pru shang lam hte Ramma ni dung law ai Hpalap seng, Wifi Seng, Billion seng zawn re ai shara ni hta hkan wang rim ai lam ni galaw nga ai sha n ga, Hkauna sa sa wa wa galaw ai ni hpe mung lam lapran hkap rim woi ai lam ni a majaw, hkawm sa hkawm wa yak hkak ai sha n ga, galaw lu galaw sha ai lam ni hta mung ding bai ding na byin taw nga ai lam Monyin ginra masha langai KNG de n dai zawn tsun dan wa ai re.

“Ya gaw Num La yawng hpe rim ai, Myo kata kaw sha rim ai n ga hkauna kaw na wa ai ni hpe mung, n dum shami hkap rim lahkawn la ai lam ni galaw nga ai. Monyin Bawdikung lawk na ramma ni hpe nga yang mung, Hkauna kaw na wa ai ten, lam lapran hkap rim woi la kau ya ma ai, Kanu Kawa ni bai hkan sagawn shaw la tim, bai n dat ya ai, ya grau grau na gaw yak wa ai ga rai nga ai. Lagu Lagut lam ni gaw law she law wa galaw sha gaw yak,” nga tsun dan ai re.

Dai sha n ga, lai wa sai Shata hta mung Monyin ginwang Pin He mare hte In Kyin Kung mare ni hta mung Hkauna galaw taw ai yi wa de du hkra sa nna, ramma n kau hpe sa rim woi mat ai nga tsun dan wa ai re.

Dai zawn sha Nan Hkwi mare hta mung asak rai n hpring ai ma kaji 2 hpe SNA dap ni sa rim woi mat ai lam matut chye lu ai re.

“Nan Hkwi Mare na Ma kasha lahkawng hpe mung ya hte shani Bun Tung Lung Mare kaw SNA ni rim woi mat ai, asak n hpring shi ai, Ma ni sha naw re ngu hkan tsun tim n dat ya mat ai, ya gaw, Hpyen wunkat dabang de sa kau sai nga tsun ai,” nga Nan Hkwi mare na amyu shayi langai mung KNG shiga dap de tsun dan wa ai re.

Ya Hkauna shang ten hta, Sam Hkyeng SNA dap ni kaw na laja lana hpyen rim lahkawn taw nga ai majaw, ginra masha ni a matu yak hkak jam jau hkrum taw nga nna, asak kaba sai ni hkrai sha hkauna shang bungli galaw taw nga ra ai lam chye lu ai.

Ya ten, Indawgyi ginra hta Sam Hkyeng SNA dap hte KIA PDF dap ni lapran majan laja lana gap gasat hkat taw nga ai re.

Dai rim lahkawn la lu ai ramma ni hpe Mogaung Ginwang Kanyin Myaing mare hte Myitkyina Hpyen sharin shakyang dabang ni de sa taw ai lam chye lu ai.

August 18 ya jahpawt hta mung hpyen rim lahkawn woi la hkrum ai Hpyenla ni hpe htaw da ai Mawdaw langai hpe Namma mare num shang kaw KPDF dap ni hkap gap gasat wa ai re.

Monyin Mogaung ginra na mung shawa ni gaw, madung hkauhting hkauna galaw sha ai mung shawa ni re.

Ya na zawn shani shagu hpyen rim lahkawn ai lam a majaw, ginra masha ni yak hkak hkrum taw nga ai lam mung rai nga ai.