Katsu Mare Hpyen Yen mung shawa ni mare de bai wa nga taw sai rai tim, Hpaji jawng dum n ta n lu ai majaw, yak hkak hkrum taw nga ai lam chye lu ai.
Katsu Hpyen yen mung shawa ni gaw, lai wa sai 2011 ning Jinghpaw mung majan n nan byin wa ai ten kaw na hprawng yen ai mare buga rai nna, Manmaw lam kaba mayan yawng hpe KIA gasat zing madu kau sai majaw, mare buga de bai n htang wa nna, buga gaw sharawt magam bungli ni hpe wa galaw taw ai, mare kahtawng langai mung rai nga ai.
Katsu mare masha ni lai wa sai shaning kaw na mare dum n ta de bai wa nga taw sai rai tim, ma ni a jawng lung laika hpaji sharin na hpaji jawng n lu ai majaw, yak hkak taw nga ai lam,ginra masha langai KNG shiga dap de n dai zawn tsun dan wa ai re.
“Ma ni laika sharin na matu Jawng dum n ta mung n nga ai, n ta kaw sha mai byin ai hku lung taw nga ai, ngut na Jawng Sara Saranum mung n law ai. Lanam ta bai re nga yang gaw, ma ni a matu mung lam shagu grai yak ai, Jawngma kanu kawa ni mung n lu madi shadaw ai re nga yang gaw, Sara Sarama mung n law ai, ya law law se gaw mai byin ai hku, masha rai n wa nga ai dum n ta ni hkan sharin hkat taw ai ga rai nga ai,” nga tsun dan wa ai re.
Katsu Hpyen yen mung shawa ni gaw, lai wa sai 2024 ning kaw na mare buga de n kau bai wa n htang nga sai rai tim, lam shagu hta naw yak hkak ai majaw, n kau hpyen yen dabang de bai sa nga mat ai ni mung lawm ai rai nna, ya ten, mare kata htinggaw 50 jan wa nga taw sai lam chye lu ai.
Mare kaw wa nga ai rai tim, Jawng rai n lu gaw gap shi ai majaw, masha rai n wa nga ai dum n ta shat gawk ni hkan mai byin ai hku naw sharin hkat taw ai lam n dai zawn matut tsun dan wa ai re.
“Nta langai kaw yup gawk lahkawng rawng yang, yup gawk Langai kaw atan gawk mi, Ma law ai atan gawk ni hpe gaw, n ta langai kaw sha yawng hpe sharin ai. Ya sharin nga ai n ta 3 kaw sha re majaw atan gawk n law na makau de Muga bai galup la jat rai na sharin taw ai, rai tim mung Marang htu yang grai n manu ai, dai majaw ya yang gaw, chyingdaw daw hku na sha naw sharin hkat nga ga ai.” Nga matut tsun dan ai re.
Ya ten Katsu Mare hta Lawu tsang jawng hpaw da ai rai nna, Jawng ma yawng marai 60 daram nga ai hta Jawng Saranum marai 3 Jawng Sara La 1 yawng marai 4 sha nga ai re lam chye lu ai.
Jawng Sara Saranum n law ai majaw, atan gawk lahkawng hpe Sara langai sha sharin ra ai lam ni byin taw nga ai re.
Mare buga de bai n htang wa ai Hpyen yen mung shawa ni ya ten tinang mare buga bai gaw sharawt taw nga ai aten ladaw re ai majaw, hpaji jawng rai n lu gaw gap la shi ai mung rai nga ai.
Katsu mare na Lapran tsang hte Lahta tsang jawng ma ni gaw, Gara Yang mare de jawng sa lung ai re.
Katsu Mare hpe ya ten KIO Uphkang Sairu hte sa taw ai rai nna, Hkam Ja lam a matu tsi rung tsi gawk hte Hpaji jawng ni ya hkyak hkyak ra taw nga ai lam mung rai nga ai.
Katsu Mare hte hpawn, Waimaw Manmaw Lam kaba ding yang yawng ngu na ram hpe KIA hte Pawng hpawm dap ni 2023 ning hta htim shagrawt kau ma ai hpang, Mung mare masha n kau maning kaw na wa nga hpang wa ai mung rai nga ai.
Katsu mare de bai n htang wa nga taw sai hpyen yen mung shawa jahpan htinggaw 120 daram nga ai rai tim, ya wa nga taw ai gaw, hting gaw 50 ram sha re lam chye lu ai.
