Hpakant ginra hta Mung Shawa marai 2 bai gap sat hkrum wa ai nga ginra masha ni tsun shana wa ai re.
Dai ni August 22 ya jahpawt hkying 10 ten daram hta Mawsiza mare lam kaba n tsa, lahta tsang jawng makau na, စိန်ချိုကွမ်းယာ seng shawng kaw La lahkawng hpe gap sat da ai hpe mu ai nga, Hpakant ginra masha langai KNG de ndai zawn tsun dan wa ai re.
“gadai gara maga na gap sat ai hpe chyawm n chye ai, dai hpawt hkying 10 ram hta Mawsiza hpaji jawng makau na စိန်ချိုကွမ်းယာ seng shawng kaw gap sat da ai,” nga na tsun dan wa ai re.
Dai kaw gap sat da hkrum ai yan gaw, asak 45 ning re ai Ko Chit Naing hte Musilm La langai re lam chye lu ai.
Ndai gap sat hkrum ai lam the seng nna, gadai gara wuhpung maga na gap sat ai re n chye ai zawn, ya gap sat hkrum ai yan mung kaning re ai masha ni re ngu hpe atsawm tup hkrak n chye lu ai re.
Dai Ko Chit Naing ngu ai wa gaw, Lawng Hkang Lay Pyin lawk kaw n ta shap na nga ai wa re lam chye lu ai.
Ko Chit Naing gap sat hkrum ai Minute 10 ram na ai hpang jahkring nga hte Mawsiza mare na Mawdaw lam kaba n tsa kaw kalang bai la langai gap sat hkrum wa ai re.
Hpang kalang bai gap sat hkrum ai mung mi shawng e gap sat ai shara makau hta sha re lam chye lu ai.
Hpakant ginra de lai wa sai April Shata kaw na Myen hpyen hpung ni bai htu lung wa ai hpang kaw na, majan n hpan byin wa ai hpang, ya na zawn mung shawa ni jahkring hkring gap sat hkrum taw ai lam mung rai nga ai.
Mara kata Mung shawa gap sat hkrum ai sha n ga, laknak kaba a majaw Hpakant mung shawa ni jahkring hkring si hkala hkrum taw nga ai re.
Ndai Shata laman hta Myen Hpyen dap laknak kaba a majaw, mung shawa marai 7 si hkrum nna, marai 10 jan hkala hkrum wa sai re.
