Mogaung Ts.K.Hk (3) kaw na Myen Hpyen La Mawdaw Kaba (5) Hpyen N-gun (300) daram Hpakant lam de matut lai lung wa taw nga ai lam, Shawng lam hpyen magam gun the ni nawn ai ni KNG shiga dap de tsun dan wa ai re.
Dai hpawt manap hkying 10 ten daram hta Mogaung Ts.K.Hk (3) kaw na Myen Hpyen Mawdaw Kaba (5) Hpyen N-gun (300) daram Hpakant de lai lung wa na matu, Kamaing lam numshe kaw tsap taw ai lam chye lu ai.
Dai Mawdaw Kaba 5 kaw lawm lung wa ai Myen Hpyen N-gun 100 daram gaw, Ma U Pin, Ye Ka Ta mare na Kareng La Kuk a Company wang kaw yu nan taw nga nna, Myen Hpyen-la marai 200 jan daram gaw, Namya mare de lagaw lam hku na matut lai lung wa taw nga ai lam KNG Shiga dap de tsun dan wa ai re.
“Dai Hpawt manap Mogaung Ts.K.Hk (3) kaw na Myen Hpyen Mawdaw Kaba (5) Hpyen N-gun hpring hpring (300) daram ngu maram lu ai hpyen hpung ni Hpakant de lai lung wa taw ai, dai kaw lawm ai hpyen n gun n kau gaw, Ma U Pin na Kareng La Kuk Company wang kaw hkring kau da nna, n kau law malawng gaw Namya de lagaw lam hte bai lai lung wa taw nga ai,” nga tsun dan wa ai re.
Ndai August Shata praw 9 ya shani kaw na kalang bai htu lung wa ai Hpyen Hpung ni gaw, August 16 ya shani Nam Ya mare de du shang ai hpang, Nam Ya, Kap Maw, Senghpra Mare ni hta dap jung shara jahkrat da sai lam chye lu ai.
Ndai kalang lung wa ai hpyen hpung hta, law malawng Pyithutsit hpyenla ni law ai rai nna, dai hpyen hpung ni gaw, Namya mare zawn re ni hta dap jung shara jahkrat na matu rai na re nga, Hpyen masa yu maram taw nga ai Mung shawa langai KNG de n dai zawn matut tsun dan wa ai re.
“Ndai kalang bai lung wa ai စစ်ကြောင်း kaw Pyithutsit ni grai law lawm ai nga tsun ai, dai Pyithutsit ni hpe yu yang mi shawoi hkan dap jung ai Nam Ya mare zawn re hkan dap shara jahkrat na matu lawm lung wa ai rai na masa nga ai,” nga nna tsun maram tawn ai re.
Ya bai lung wa ai Myen Hpyen hpung ni gaw, numdaw 3 lang ngu na htu shadut lung wa ai hpyen hpung ni rai nga ai.
Lai wa sai April Shata kaw nna, Myen Hpyen dap ni ginra madu Pyithutsit hpyen n gun law law jai lang nna, Hpakant lam mayan KIA dap shara yawng hpe htim gasat nna, Hpakant de hpyen n gun kaba hte htu lung wa ai rai nga ai.
Shawng nnan htu lung wa ai Hpyen hpung ni gaw, Hpakant du ai hpang, Company wang shara ni the jak rung jak rai ni hpe wan hkan nat jahten hkawm taw ai hpyen hpung ni rai nga ai.
Numdaw lahkawng lang ngu na lung wa ai Myen Hpyen hpung nig aw, Mawmaw bum maga de htu shadut taw nga ai hpyen hpung ni rai nna, Dai hpyen hpung ni hte ya ten, Mawwan Kaji, Kaba, hte Sut Bum, Sharaw Hka mare makau grup yin ni hta ding yang gasat poi byin nga ai re.
Ya numdaw masum ngu na bai htu lung wa ai Myen hpyen hpung ni Hpakant de du mat wa ai rai yang, Hpakant ginra n dai hta grau nna, Majan laja lana byin wa na masa nga ai lam ginra masha ni tsun maram da ai re.
Myen Hpyen dap ni gaw, Hpakant ginra hpe n lu yang lu hkra hpyen n gun kaba the htu gasat nna, Ra lata poi byin hkra galaw nna, Myen hpyen Asuya kaw na tara Upade (တရားဥပဒေစိုးမိုးရေး) the hkrak rai lu up hkang hkra shakut taw nga ai lam re nga, mung masa yu maram ai ni tsun da ai re.
Hpakant ginra hta Hpyen masa matut shaja hkat taw nga nna, Myen Hpyen dap kaw na hkrup mara gap shadam ai Laknak kaba si a majaw, mung shawa si hkala ai lam ni jahkring hkring byin nga ai re.
