Jinghpaw ni Hpe Zingri nga ai Sam Hkyeng SNA dap ni zing da ai Mai Nawng ginra hpe KIA matut Htim Gasat nga
Nawnglut Indawgyi ginra na Mai Nawng Mare hte Ma Mung Kai mare ni kaw dap jung nga ai Sam Hkyeng SNA hte Pyithutsit Hpyen Hpung ni hpe Wunpawng Mungdan Shanglawt Hpyen Dap KIA hte PDF pawng hpawm dap maga bai htim gasat shachyut kau lu sai lam chye lu ai.
Mai Nawng hte Ma Mung Kai Mare kaw dap jung shara jahkrat nga ai Sam Hkyeng SNA hte Pyithutsit pawng hpawm dap ni hpe KIA hte PDF dap maga, lai wa sai bat kru ya shani sa htim gap gasat ai hta, Mai Nawng Mare na Sam Hkyeng Dap shara lahkawng hpe gasat shachyut kau lu nna, Ma Mung Kai mare na Dap shara yawng hpe gaw gasat kau lu sai nga, dai ginra na magam gun langai KNG de n dai zawn tsun dan wa ai re.
“Mai Nawng hpe kru ya shani kaw na bai sa gap gasat ai, shara lahkawng hpe gaw lu gap jasan kau sai, Myen ni Nbungli bawm nau jahkrat ai majaw, a tsawm gaw rai n lu jasan shi ai, Makau grup yin ma naw gap hkat ai, Ma Mung Kai mare chyawm asan rai sai,” nga nna tsun dan ai re.
Ya matut nna rai tim, Mai Nawng hpe gaw, tsep kawp gasat shachyut kau lu ai lam gaw rai n nga shi ai rai nna, Mai Nawng Mare makau grup yin ni hta laja lana matut gap gasat hkat nga ai zawn, Myen hpyen dap maga na nbungli hte laja lana wa gap sharu bun taw nga ai lam ginra masha ni kaw na chye lu ai.
Dai ginra hta lai wa sai July 14 ya shani Myen Hpyen dap hte Sam HKyeng SNA dap ni laknak kaba majoi hkrup mara gap shadam bun shang wa nna, mare yawng hpe wang zing kau ai hpang, mare dum n ta n kau wan nat jahten ai lam ni galaw wa nna, Jinghpaw nta re ai ni yawng hpe zaw hkat pat zing kau ma ya ai rai nga ai.
Dai zawn Sam Hkyeng SNA dap ni mung mare masha ni hpe majoi ding sa roi rip zingri sat nat ai lam ni galaw wa ai majaw, dai ginra yawng hpe KIA maga ya na zawn bai htim gasat wa ai mung rai nga ai.
