Pyithutsit Dap ni Drone Bawm hkrup mara Jahkrat Bun taw ai majaw, Mung Shawa 2 asak si hkrum
Hpakant lam Kamaing Mare makau grup yin ni hta, Wara Zup Pyithutsit hpung ni kaw Drone bawm hkrup mara jahkrat bun hkawm taw nga ai majaw, mung shawa marai 2 asak si hkrum wa ai lam chye lu ai.
Mani August 13 ya shana hkying 6 aten daram hta Ma U Pin, Ye Ka Ta kaw dap jung shara jahkrat nga ai Myen Hpyen dap hte Pyithutsit ni Kamaing mare lawk 2 na Slg Jadup Zau Jum Asak 21 ning Loi Dau Pa hkau na galaw nga ai hpe Drone bawm sa jahkrat bun ai majaw, dai shara hta nan asak si hkrum wa ai lam ginra masha langai KNG shiga dap de tsun dan ai re.
“Kamaing Kawngra Lawk (2) kaw nga ai Slg Jadup Mung Gawng a kasha Shd Jadup Zau Jum Asak (21) ning re ai ramma la kasha Hkauna pa kaw hkauna shang na nga taw ai hpe August 13 ya shana Pyithutsit dap ni wan chyi taw ai majaw nga nna, Drone bawm sa jahkrat bun ai kaw asak si hkrum mat ai rai nga ai,” nga tsun dan ai re.
Ya ten Myen Hpyen dap hte Pyithutsit hpyen n gun 500 daram gaw, Hpakant de Numdaw 3 lang hku na bai htu shadut taw nga ai majaw, Kamaing the Nam Ya mare lapran shani shagu majan gap gasat hkat taw nga ai re.
Mani August 14 ya shani ka-ang aten daram hta mung, Myitkyina kaw na lung wa ai mawdaw langai hpe Drone bawm hkan jahkrat bun wa ai majaw, Mawdaw Sara wa asak si hkrum nna, dai hkan hkan jawn lawm ai mung shawa lahkawng hkala sawng hkrum wa ai re.
Dai Mawdaw gaw, August 13 ya shani Myitkyina kaw na lung wa ai rai nna, Dai 13 ya shana Jan du mat ai majaw, Nlung Dup dabang kaw yup kau shangun nna, dai kaw na hpang jahpawt Namya mare de bai lai lung mat wa ai gaw, Nam Ya mare rai n du lu shi ai shara kaw Drone bawm jahkrat hkrum wa ai rai nga ai.
Ndai laman Pyithutsit dap ni Drone the shani shana pyen gayin nna, Hpakant maga de hpyen htu shadut ai lam ni galaw taw nga ai re.
Lam lapran majan byin nga ai laman, mung shawa yawng kaw na mung hkawm sa hkawm wa sadi na lam, ginra masha ni tsun sadi jaw da ai re.
August 13 ya shani hta mung Myitkyina kaw na Hpakant de lung wa ai hpung magam gun n kau hpe Nlung dup dabang makau kaw Pyithutsit ni hkap jahkring san jep nna, adup gayet zingri ai lam ni byin wa ai nga, hkrun lam hkawm mung shawa ni tsun ai re.
