Hpakant Sharaw Hka Mare Rawang Kawng kaw, Myen hpyen dap gap dat ai laknak kaba si wa hkrat ai majaw, Mung shawa marai 5 Hkala hkrum wa ai lam chye lu ai.
Dai ni August 14 ya shana maga hkying 1 aten daram hta Hpakant Byuha Kawng kaw na Drone bawm ngu na maram lu ai laknak kaba si Rawang Kawng kaw wa hkrat ai majaw, dai kaw nga ai mung shawa marai 5 hkala hkrum wa ai nga, ginra masha langai KNG de n dai zawn tsun dan wa ai re.
“Myen Hpyen Byuha kawng kaw na re ngu maram lu ai, rai n gap shi ten laman du hkra lamu n tsa pyen gayen taw nga ai hpe maram yu nna, Drone re nga nna tsun taw ma ai. Sharaw Hka mare na asak kaba sai ni the Num Ma ni gaw tau hkrau nna, hprawng yen ma sai. Dum n ta sin na matu n gun ja ai La Wangan ni sha nga ai rai nga ai,” nga tsun dan ai re.
Sharaw Hka Mare lai wa sai August shapraw shawng na bat kaw laja lana gap gasat hkat wa ai hpang, ya majan n byin ai bat mi jan na ai hpang, ya na zawn, Laknak kaba hte kalang bai gap hkrum wa ai rai nga ai.
Myen Hpyen Dap gap bun ai Drone bawm a majaw, asak 16 ning re ai Htang Shan Khaing, asak 52 ning re ai Salang Win Naing, asak 56 ning re ai Slg Ye Naing, asak 57 ning re ai Slg Htoo Kyaw, asak 50 ning re ai Slg Tin Htun ni re ai lam chye lu ai.
Hpakant ginra hta Myen hpyen dap the KIA dap lapran majan laja lana gap gasat hkat taw ai ya Shata 3 jan na wa sai rai nna, Myen Hpyen dap ni tat sum kau da ai shara ni hpe bai gasat zing la lu hkra shakut taw ai mung rai nga ai.
Ya Drone bawm jahkrat hkrum ai Sharaw Hka mare gaw, Hpakant Byuha kawng the deng 3 daram sha tsan ai shara re lam chye lu ai.
Hpakant ginra hta lahkawng maga na gap ai laknak kaba a majaw, Si Hkala hkrum ai mung shawa marai 30 hkawt ram du sai lam chye lu ai re.
