KIA tat sum da ai Hpakant Lagat Kawng Dap shara hpe Bai Gasat Zing La Lu
Hpakant Sharaw Hka mare, Lagat Kawng mayan kaw dai hpawt ma nap jau, Myen hpyendap hte Wunpawng mungdan shanglawt hpyendap KIA PDF dap ni lapran gasat gala majan laja lana byin wa ai hpang, KIA ni tat sum da ai Lagat kawng dap shara hpe bai gasat zing madu la wa sai lam chye lu ai.
Lai wa sai 2024 ning hta KIA PDF pawng hpawm dap ni dap jung shara jahkrat da ai, Lagat kawng dap shara hpe , Myen hpyen dap ni, lai wa sai Bat kru ya shani Hpyen n gun kaba hte htim gasat lung wa ai majaw, KIA PDF dap maga jahkring gan yen kau ra mat ai re.
Lagat kawng dap shara hpe ,dai hpawt manap jau hking 5 grup yin ram kaw na bai sa htim gap gasat wa ai hta, dai hpawt atsawm sha bai lu zing madu la wa sai lam ,Hpakant Shawng lam hpyen magam gun the ni nawn ai Salang langai KNG shiga dap de ndai zawn tsun dan wa ai re.
“Dai hpawt manap hkying 5 Myi hprim hpram mu wa ai ten, an hte maga na ni bai sa htim gap ma ai, lahkawng ya tat sum kau da ai Lagat Kawng dap shara hpe bai gasat zing la lu nna, ya gaw a tsawm sha bai dung da sai, ya gaw, makau hkan grai naw gap hkat nga ai. Dai ni shani ka-ang mung Drone bawm bai sa jahkrat ai, laknak kaba the gaw ding yang naw nut hkat taw ma ai,” nga tsun dan wa ai re.
Hpakant Ginra hta August shata praw langai ya shani kaw nna, Mawmaw layang hte Sut-bum mare ni hta hpyen n-gun htu bang da ai, Myen hpyen hpung ni, Sharaw hka, lagat kawng maga de htu shadut htim gasat shang wa ai majaw, KIA hte PDF dap maga na gan yen kau ra ai rai nga ai.
Aug praw 3 ya shani kaw nna, dai hpawt manap jau du hkra, KIA hte PDF dap maga na, Lagat kawng shara hte Myen hpyendap nga ai shara ni hpe kalang bai htim gasat nga ai majaw, dai makau grup yin ni de, majan naw laja nga ai re.
Majan bai byin hpang wa ai, 3 ya laman hta mare kata laknak kaba si hkrat nna, Sharaw Hka, Sanchyoi, Chyauk Hpyu mare na mung shawa marai 13 hta n-yawm ai sha si hkala hkrum wa sai re.
Mani lani mi na laman hta sha, Drone laknak kaba si a majaw, Sharaw-hka mare na mung shawa marai 7 hte Sanchyoi mare na mung shawa la marai 4 hkala nba byin hkrum wa ai re.
Bai dai hpawt daw jau hta mung majan byin ai shara hte Hpakant Byuha kawng ntsa kaw na, gap dat ai laknak kaba si, Sharaw hka mare lai nna, Chyauk Hpyu mare kaw wa hkrat kapaw ang ai majaw, mung shawa marai 7 hkala hkrum wa ai re.
Dai mung shawa marai 7 hkala hkrum wa ai hta, asak 5 ning re , ma kaji langai hte , asak 35 ning re, la wa ngan langai asak si hkrum wa nna, ngam ai la marai 5 gaw hkala sawng wa ai lam hpe hpakant ginra masha ni tsun dan ai re.
Ya ten Hpakant Ginra hta Myen Hpyen dap the KIA dap lapran hpyen masa matut shaja hkat taw nga ai zawn, Yuma mare kaw mung hpyen masa shaja hkat taw ai majaw, Seng Tawng mare maga de mung majan bai byin wa na masa nga ai lam ginra masha ni tsun maram da ai re.
