Warazup Pyithutsit Hpung Jahkrai Ma Ginra kaw Drone Bawm Sa jahkrat bun

Wara Zup Pyithutsit Hpung ni Wara Zup mare num shang na Hpungkyi jawng kaw Drone bawm sa jahkrat bun ai majaw, Jawng ma marai 2 si nna, marai 5 hkala hkrum wa ai lam, Wara Zup Ginra masha ni tsun ai re.

Lai wa sai July 29 ya jahpawt hkying 7 aten daram kaw, Wara Zup mare numshang na Hpungkyi jawng wang hta jawng sa na matu shat shadu sha jawng taw ai kaw, Drone bawm sa jahkrat bun ai majaw si hkala hkrum wa ai re nga ginra masha langai KNG de n dai zawn tsun dan wa ai re.

“ Dai Hpungkyi jawng kaw gaw, yak hkak matsan ai ma ni the, Jahkrai ma zawn re ni nga ai shara rai nga ai. Dai kaw Jahpawt jawng sa na matu shat lusha hkyen shajin sha taw ai kaw, Min Zay Thant Pyithutsit hpung ni gaw, KIA PDF ni wa shang rawng taw sai ngu na jahkrat bun ai re da.” Nga nna, Min Zay Thant Pyithutsit the ni nawn ai Ja htu lauban langai KNG shiga dap de tsun dan wa ai re.

Dai Hpungkyi Jawng wang gaw, Jahkrai ma ni hte yak hkak ai Bum na ma ni hpe woi lakawn na jawng lung hpaji sharin ya taw ai shara re lam mung chye lu ai.

Wara Zup Pyithutsit ni maga na Jahkrai ma ginra hta Drone bawm sa jahkrat bun wa ai lam the seng nna,lit nga ai Hpungkyi wa kaw na Pyitutsit ni hpe sa tsun yang,  dai kaw masha grai law kamawng taw ai majaw, KIA PDF ni re ngu yu shut ai majaw, jahkrat bun ai lam re ngu bai tsun tsun dan wa ai lam chye lu ai.

Wara Zup Pyithutsit hpung ni, dai jahkrai ma ginra kaw Drone bawm lahkawng sa jahkrat bun ai majaw, asak 15 ning re ai hte 12 ning re ai Jawng ma lahkawng si hkrum wa ai re.

Dai si hkrum ai dum n ta hta, Pyithutsit Hpyen ma ni sa wa nna, shan hte a ning baw Min Zay Thant n nga ai ngu sa tsun let, gumhpraw Sen 30 sha sa ya kau da nna, bai n htang wa mat ai lam chye lu ai.

Min Zay Thant Pyithutsit hpung ni kaw na ya na zawn mara kata jawngma ni nga ai shara kaw bawm sa jahkrat bun ai majaw, dum n ta masha ni myit n pyaw yawn hkyen hkrum taw nga ai re.