Hpakant Ginra hta KIA maga gap masat shading shut nna, Mung shawa nga ai dum n ta kaw wa hkrat kapaw ai majaw, Mung shawa langai si nna, marai 2 hkala hkrum wa ai lam Hpakant ginra masha ni tsun ai re.
July 30 ya shana hkying 9 aten daram hta Hpakant Mawmaw bum maga na gap dat ai laknak kaba Mawsiza mare na ဖြူစင်ကုန်း shara hta wa hkrat ang ai majaw, dai kaw nga ai Myen htinggaw shan Nu Wa ni masum si hkala hkrum wa ai rai nga ai.
Laknak kaba wa hkrat bun ai majaw, shan Nu wa ni masum nga taw ai hta, Kanu ngu na wa gaw asak si hkrum wa nna, Kasha Num kasha wa gaw, lata daw kau ra ai hte, Madu wa gaw hkala sawng wa ai re.
Asak si hkrum ai amyu shayi wa gaw, asak 37 ning ram re ai မထိုက်ထိုက်ဝင်း ngu ai wa rai nna, lata daw kau ra ai Kasha num kasha wa gaw asak 15 ning re ai ဇွန်းရတီထက် rai nna, Madu wa mung asak 37 ning ငြိမ်းချမ်းအောင် ni re lam chye lu ai.
Hpakant ginra hta Myen Hpyen dap hte KIA dap lapran ding yang na hpyen masa matut shaja hkrum taw nga ai re.
