Jinghpaw mung, Muklum shagu hta, n ta shap manu tsaw rawt ai majaw, lam amyu myu hku na muklum kaba ni de hprawng yen du shang wa ai hpyen yen mung shawa ni yak hkak taw nga ai lam chye lu ai.
Myitkyina, Monyin Mogaung, Putao, Hpakant ginra ni hta Hpyen yen mung shawa grau grau law jat wa nna, dum n ta shap ai ni mung lani the lani grau law jat wa ai majaw, ya na zawn n ta shap manu ni tsaw rawt ai re nga, Monyin na amyu shayi langai KNG de tsun ai re.
“Ndai ten na masa lam a majaw mung, Gunrai manu ni a majaw mung shawoi na manu the n mai shap mat ai re. rai tim mung n kau gaw, shap ai ni law wa jang majoi joi manu sharawt na shap sha ai ni mung nga ai. Nkau gaw, Poi Tsa ni a majaw hpu ai ni mung nga ai,ndai ten na masa gaw, shap sha ai ni hpe hkrai mara shagun ai baw gaw n rai nga ai.” Nga nna, Myitkyina kaw nta sun wang dut shap poi tsa galaw ai amyu shayi langai KNG de tsun dan wa ai re.
Ya ten Mogaung Monyin ginra ni de, Nawnglut de na hpyen yen ni du shang wa ai majaw, shawoi mun 5 ram sha jaw ra ai dum n ta ya Sen mi jan jaw ra mat ai nga tsun dan wa ai re.
Monyin muklum kata na Pe 10 grup yin sha nga ai gawk langai shawoi mun 5 sha jaw ra ai rai tim, ya gaw, Sen mi jaw nna, shap rawng ra taw sai rai nna, shawoi sen 3 ram sha re ai dum n ta langai ya sen 6 the shap ra mat sai nga Monyin na amyu shayi langai mung ndai zawn tsun dan wa ai re.
“Nta shap manu ni shawoi na hta htam 2,3 manu tsaw rawt mat ai. Monyin kaw nga yang Indawgyi maga na ni, Hpakant de hkan n ani wa mahkawng hprawng yen ai shara re majaw,shawoi mun 5 sha jaw ra ai n ta ni ya Sen mi ram the shap rawng ra ai, matut nna mung n ta shap manu tsaw rawt nga ding yang re,” nga tsun dan ai re.
Monyin ginra de gaw, Sagaing Indaw Katha majan n hpan a majaw, hprawng yen du wa ai mung shawa ni the Hpakant lam Se Zin hkan na hprawng yen du wa ai hpyen yen mung shawa ni law ai re lam chye lu ai.
Dai zawn sha, Hpakant ginra hta mung shara shagu majan n hpan byin wa ai the rau, dum n ta shap manu ni mung tsaw rawt taw nga ai re.
Hpakant Myo kata hkan ya ten, gawk tam grai yak mat nna, gawk shap manu tsaw rawt ai sha n ga, gun rai manu tsaw rawwt ai lam ni a majaw, lam shagu hta yak hkak hkrum nga ai lam, Hpakant ginra hta bungli galaw nga ai, Salang langai KNG de tsun dan wa ai re.
Myitkyina myo kata hta nga yang mung shawoi sen 3 ram sha jaw na shap rawng mai ai n ta ni ya sen 6 jaw na shap rawng ra mat sai nga Myitkyina ginra kata na mung shawa langai tsun ai re.
Ya ten Jinghpaw mung kata Hpyen Yen mung shawa Sen 10 jan nga ai lam, UNHCR a sumtang laika hta tsun da ai re.
Jinghpaw mung a masha jahpan htam masum kaw na htam mi ram gaw, Hpyen yen re lam matut tsun da ai hpe mu lu ai re.
