Kutkai Mare Nbungli bawm wa jahkrat bun ai majaw Mung Shawa Marai 6 si, Marai 8 Hkala hkrum

Mungmyit Sinli Kutkai muklum lawk 2 na Hotel Yar Su Thit shara hpe Myen Hpyen dap Jet Nbungli the bawm wa jahkrat bun ai majaw, mung shawa marai 6 si nna, marai 8 hkala hkrum wa ai nga, ginra masha ni tsun ai re.

Dai hpawt manap hkying 00:55 Am aten wa jahkrat bun kau da ai rai nna, Hotel makau the Hotel makau na n ta kaw wa hkrat ang ai majaw, mung shawa si hkala hkrum wa ai re nga tsun ai re.

“Shawoi nga yang nbungli n sen na ai, mana gaw hpa nbungli n sen mung n na ai kalang ta Bawm kapaw ai nsen kaba sha na dat ai, Yar Su Thit Hotel kaw nbungli bawm wa jahkrat ai nga tsun sai gaw, sa yu yang gaw makau na n ta mung hkra rai nna dai kaw nga ai hkan woi dwi yan mung si ai ga rai nga ai,” nga Kutkai mare amyu shayi langai KNG de tsun dan wa ai re.

Myen hpyen dap maga ya na zawn Hotel kaw sha ang nna nbungli bawm wa jahkrat bun ai gaw,  Myen Hpyen dap hpe shiga jaw ai ni nga ai majaw re lam ginra masha ni tsun maram nga ai re.

Mani July 29 ya shani hta Balawng TNLA Ninggawn Amu madu kaba hte Ningtau Ningbaw ni Kutkai mare sa du kau da ai lam chye lu ai.

Ya Nbungli Bawm sa jahkrat ai Yar Tsu Thit Hotel hta Rawt malan magam gun ningbaw ni jahkring hkring pru shang hkring sa ai lam ni nga ai Hotel re lam matut chye lu ai re.

Myen Hpyen Nbungli bawm wa hkrat ai Hotel makau na dum n ta langai yawng hten ayai mat ai majaw, dai nta kaw manam ai, mung shawa lahkawng mung si hkrum wa ai re.

Ya si hkala hkrum ai ni gaw, Hotel kaw manam ai ni the, n ta makau na adwi dinggai langai hte Ma kaji langai si hkrum wa ai lam chye lu ai.

Kutkai muklum hpe Balawng TNLA dap ni htim gasat zing madu kau ai hpang, 2025 ning shaning n nan daw de kalang wa jahkrat bun wa yu ai rai nna, ya n bungli n wa ai tsawm ra na ai hpang, mana bai wa jahkrat bun wa ai re nga, ginra masha ni tsun ai.

Ndai laman Sinli mare hpe Myen Hpyen dap lata de bai ap kau na shiga ni pru nga ai majaw, Kutkai mare kata hta mung Majan kaba bai byin wa na hpe ginra masha ni myit tsng taw nga ai re.

“Ya Lashio hpe mung Myen ni hpe jaw kau sai, Ya Sinli hpe mung bai jaw kau rai yang gaw, Kutkai mare gaw, Sinli hte Lashio mare Myen a lapran kaw matep mat sai, dai hku rai yang gaw, shi the shi Myen a lata du sai ga rai nga ai,” nga tsun ai re.