Indawgyi Ginra na Mung Shawa ni hpe Makawp maga garum la na lam ginra masha ni hpyi shawn nga
Nawnglut Ginra na Hpyen Yen mung Shawa 5000 jan ya hkyak hkyak garum ningtum lam ni ra ahkyak taw nga ai lam chye lu ai.
July 15 ya jahpawt Sam Hkyeng SNA hte Myen hpyen dap ni Indaw Nawng makau grup yin na mare kahtawng ni hpe htim gasat zing madu wa ai majaw, hprawng yen hkawm wa ra ai rai nga ai.
Mai Nawng Mare hpyen yen mung Shawa ni gaw, Sam Hkyeng dap ni du shang wa ai hpang hprawng yen hkawm mat wa ai gaw, Mai Nawng Kaw na Mamung Kai, dai kaw na Nam mate, Nam mate kaw na Loi Mun mare ni de hprawng yen hkawm mat wa ai rai nga ai.
Sam Hkyeng SNA dap ni Mai Nawng Mamung Kai mare ni hpe htim gasat zing madu kau ai hpang, Indawgyi grup yin Mare hkan na Mung Shawa ni hpe Sam Hkyeng Pyithutsit ni gaw Mare kata nmai nga hkra laja lana jep zing ri nga ai majaw ginra Mung Shawa (5000) ram gaw Hkarang Lam hku hprawng ai ni hprawng, Hka Lam hku hprawng ai ni gaw hprawng, rai nna dum bru dum bra koi yen hkawm taw nga ai re.
“လူမျိုးရေး masing re majaw gaw, magam dap ni kaw na mung yawng hpe woi gahkyin lakawn taw nga ai, Ya Sam Hkyeng ni gaw Mare shang sai re majaw gaw Myen Sam ni hpe gaw Sa nga mai sai nga tim, shang mai na pru n mai ai, Jinghpaw ni hpe gaw mu ai kaw sat ngu ai shan hte kaw masing nga malu ai, Jinghpaw nta yawng hpe ya ချိတ်ပိတ် da ai, ya n kau gaw nam lam hku na loi shim ai shara de pru wa lu sai.” Nga Mai Nawng Mare na amyu shayi langai KNG de tsun dan wa ai re.
Dai ginra na mung Shawa 5000 ram hprawng yen hkawm nga ai hta Marai (3000) grup yin gaw shim ai de lu koi yen sai rai tim Marai (2000) grup yin gaw Nam Maling kata ni hta naw chyat rawng nga ai lam chye lu ai.
Dai ginra hta Sam Hkyeng dap ni kaw na Jinghpaw nga yang grau jep zing ri roi rip ai lam byin nga ai nn, Magam Gun ni hte mahkri shawn ai re nga nna sat hkrum Jinghpaw Mung Shawa law law rai sam lam mung shawng lam hpyen shi sawk ni tsun ai re.
Nam Maling kata koi yen nga ai Mung Shawa ni hpe hkan shachyut gap ai lam, shanhte ntsen ai ni hpe nhkyi hte galun kadoi zing ri sat ai lam ni byin nga ai majaw လူမျိုးရေး manghkang de gale wa sai lam ginra Mung Shawa ni tsun nga ai re.
