Myen Hpyen Dap Jet Nbungli langai dai na maga de Hpakant Mawwan kaji mare de Bawm wa jahkrat bun kau da ai lam Hpakant ginra masha ni KNG shiga dap de tsun shana wa ai re.
Dai na maga de hkying 3:20 aten kaw Hpakant Mawwan Kaji Mawan Kaba Hpungkyi Jawng lawu daw kaw wa jahkrat bun kau da ai lam ginra masha langai KNG de n dai zawn tsun shana wa ai re.
“Dai na maga de hkying 3 chyen ten daram hta Mandalay တံတားဦး kaw na Pyen rawt wa ai Jet Nbungli langai Nawnglut maga hku pyen gayin lung wa na, Hpakant Mawwan kaji hte Mawwan kaba lapran Hpungkyi jawng lawu kaw wa jahkrat bun kau da ai, Myen hpyen nbungli bawm hkyep Nma Yang de du hkra wa pyen hkrat ai nga” Hpakant Mung Shawa langai KNG de tsun dan wa ai re.
Kamaing lam maga de na Myen hpyen hpung ni shang wa ai ten, KIA PDF dap maga lam lapran gap gasat ai lam n galaw na matu tsun jahkrup bawng ban wa ai rai nna, lama Hpakant de lung wa ai lam hta dingbai dingna jaw gap gasat ai rai yang, Hpakant ting hpe nbungli bawm jahkrat bun na nga Myen hpyen dap maga tsun lai wa ai re.
Hpakant ginra de Myen hpyen hpung ni lai wa sai May 30 ya shani du shang wa ai hpang, Company jak rai hte ginsum ni hpe hkan nat jahten hkawm nga ai hpe PDF dap maga Mani shawng shani June 17 ya shani sa gap gasat ai hta Myen hpyen dap maga Si hkrum ai masha law wa ai re.
Dai Myen hpyen hpung ni gaw, shan hte tat sum kau da ai, La Mawng Kawng, Taw Maw dap shara ni hpe bai gasat zing na matu n dai laman Mawwan Kaji Mawwan Kaba mare lam kaba ding yang hku na Maw Maw Bum maga de htu lung wa taw ai ten, KIA PDF dap maga na hkap shingla gasat ai lam ni mung nga wa ai re.
KIA PDF dap maga lam lapran hkap shingla gasat ai majaw, Myen hpyen dap maga ya na zawn Nbungli hte gap gasat wa ai masa re nga, ginra masha ni tsun maram tawn ai re.
