Hugawng Lido lam Wara Zup mare hta Myen hpyen dap Jet nbungli hte dai hpawt manap hkying 7 ram hta bawm wa jahkrat bun ai nga, ginra masha ni tsun ai re.
Dai hpawt March 14 ya jahpawt hkying 7 ten daram hta Min Zay Thant Pyithutsit hte KIA dap ni hpyen masa shaja hkat taw nga ai Wara Zup mare makau na Nam Sai hta bawm wa jahkrat bun kau da ai hpang, Jahtu Zup mare de na laknak kaba ni bai gap bun wa ai nga, ginra masha langai KNG shiga dap de tsun dan wa ai re.
“Wara Zup mare baw Nam Sai mare kaw Jet nbungli hte shawng bawm wa jahkrat bun kau da ai, Sai wan htat ai majaw, nbungli ngoi ai sha na dat ai,jahkring nga hte bawm ngoi sai gaw Nam Sai kaw re nga tsun ai, dai hpang Jahtu Zup kaw na laknak kaba agying bai gap bun, dai hpang gaw zim mat sai.” nga tsun ai re.
Myen hpyen dap Nam Sai mare kaw nbungli bawm jahkrat kau da ai hpang, Jahtu Zup mare maga de na laknak kaba ni hte mung bai gap bun wa ai rai nga ai.
Wara Zup mare hpe Myen hpyen dap nbungli hte wa gap ai ndai kalang hte rai yang lahkawng lang rai sai rai nna, shawng kalang wa jahkrat bun ai hta mung shawa langai si nna, dum nta masum hten hkrum wa ai re.
Myen hpyen dap maga ya na zawn nbungli bawm wa jahkrat bun ai gaw, Wara Zup Nam Sai mare makau grup yin ni hta KIA PDF dap ni nga ai majaw rai na re nga, ginra masha langai ndai zawn tsun maram tawn ai re.
“Wara Zup mare kaw gaw mung shawa ni gadai n nga sai, Mare kaw Shanglawt hpyenla hte PDF ni sha nga ai majaw sa gap ai rai na re, dai hpawt bawm sa jahkrat ai shara hte gade n tsan ai kaw shanglawt ni Kawa grang gate jahkrat na she nga taw ai mi, dai majaw Min Zay Thant wa shaga dat na wa jahkrat bun ai rai na re ngu maram lu ai law,” nga tsun ai re.
KIA hte PDF pawng hpawm dap ni lai wa sai February shata kaw na Wara Zup mare grup yin hta hpyen shamu shamawt nga nna, Min Zay Thant Pyithutsit hpung ni hte hpyen masa shaja hkat taw nga ai re.
Lai wa sai February 17 ya shani hta mung Wara Zup mare hta Myen hpyen dap nbungli bawm wa jahkrat nna, Mung Shawa langai si hkrum nna, dum nta 3 hten mat ai re.
February shata ram kaw na hpyen masa shaja hkat wa ai majaw, Min Zay Thant Pyithutsit ni drone ding yang shapyen nna, Jahtu Zup kaw na laknak kaba gap bun ai lam ni jahkring hkrig galaw nga ai mung rai nga ai.
Dai majaw Wara Zup ginra masha ni yawng tinang man ang ai shara ni de hprawng yen ma sai re.
