Manmaw Majan Shata lahkawng hpring ai shani hta mung laja lana matut gap gasat nga
Manmaw mare kaba hpe KIA the pawng hpawm dap ni htim shagrawt taw nga ai dai ni shata lahkawng hpring sai re.
Shata lahkawng hpring ai hpang, dai ni mung Manmaw majan laja lana matut gap gasat hkat taw nga nna, Myen hpyen dap maga de nbungli hpan hkum hte ninghkap shingla gasat taw nga ai re.
“Shata lahkawng hpring ai hpang mung matut nut tik tik naw rai taw nga ai, Manmaw hpe lu na gaw gade nna na sai, ya madung gaw n bungli na majaw sha loi yak taw nga ai, Ts.K.Hk 21 kata rawng nga ai ni hpe lu sha lu shakyet da sai, gade nna sai,” nga shawng lam magam gun langai tsun dan wa ai re.
Manmaw muklum hpe htim shagrawt nga ai shata 2 laman hta, Man Je ginra na Myen dap yawng shatsai kau lu na, Manmaw mare kata na Hpri Gang dap, Myawk dap (366) hte Nbungli Pa makau grup yin na dap shara ni yawng hpe gasat zing madu kau sai re.
Maga mi de Ts K Hk 21 hpe mung laja lana matut naw htim gasat nga ai zawn, Myen hpyen dap maga na mung madang tsaw laknak hpan hkum hte ninghkap shingla gasat taw nga ai re.
Manmaw muklum kaba hpe htim shagrawt ai lam hta, mare kaba a tsa lam shadam 80 ram hpe KIA zing madu da lu sai rai nna, ya naw matut ngam taw ai Myen hpyen dap ni hpe htim gasat ding yang rai taw nga nna, majan ding yang matut laja taw ai re.
