Majan byin ai lam n nga tim, Sinli mare hta Myen hpyen dap nbungli bawm wa jahkrat
Mungmyit Sinli ga, Sinli mare kaba hta Myen hpyen dap ni kaw na, nbungli bawm wa jahkrat bun ai majaw mung shawa dum nta hten hkrum wa ai re.
Mana January praw 1 ya shana yup tung hkying 11 jan aten daram hta Mandalay maga na lung wa ai nbungli langai hte bawm wa jahkrat bun kau da ai lam ginra masha langai KNG shiga dap de tsun dan wa ai re.
“Hpa majan mung n nga ai na sai, mana yup tung hkying 11 minute 17 ram hta Nbungli bawm wa jahkrat bun kau da ai, masha si hkala ai lam hpa n nga ai nga tsun ai, mung shawa dum n’ta lahkawng chyawm gaw la hpa n nga mat hkra hten mat ai,” nga tsun dan ai re.
Myen hpyen dap nbungli bawm wa jahkrat ai shara gaw, Sinli mare lawk 3 na Hotel Hsenwi shingdu hta wa hkrat ang ai re lam chye lu ai.
Ya nbungli bawm wa hkrat ang ai shara gaw, lai wa sai ten mung lahkawng masum lang wa hkrat yu sai shara rai nna, dai Hsenwi Hotel hta lusha seng hkum dip shara hte laga hpan hkum hkra hpaw da ai shara mung re lam sagawn chye lu ai re.
Myen hpyen dap maga na ya na zawn nbungli hte bawm wa jahkrat bun ai lam gaw, dai shara hta n htoi hkren hkren wan hpaw, mahkawn hpaw rai pyaw len taw taw re majaw, ya na zawn nbungli hte wa gap hkrum ai masa re lam ginra masha wa ndai zawn matut tsun ai re.
“woi awn ai ni n chye woi awn ai ga rai nga ai, shana mung shana ting ting wan hpaw, mahkawn box hpaw rai na she pyaw a taw ma ai mi gaw, grai tsun yang mung masa lam hta ahtu hkra wa ai majaw n kam tsun ai law, dai kaw gaw shan hte Kokang Miwa hpyenla ni galoi mung pru shang galaw nga ai shara mung rai nga ai,” nga matut tsun dan ai re.
Dai ginra hpe Kokang MNDAA dap ni 2023 ning hta htim gasat zing madu la kau nna, Kokang ni uphkang taw nga ai muklum kaba langai mung rai nga ai.
Kokang MNDAA dap maga na gap hkat jahkring da ai lam n dau da ai rai nna, Miwa asuya lapran salang tai ya ai hte, Miwa mung Hkwi Min mare hta hkrum jahta bawng ban ai lam ni galaw lai wa ai rai tim, mahtai kaja n pru ai re.
