Wunpawng Mungdan Shanglawt Hpung KIO Ningbaw kaba woi awn ai hpung ni hte Miwa ginjaw Party hpung shang salang Wu Ken hte Miwa gumsan mungdan HKunmin mare kaba hta dai ni December 11 ya shani hkrum jahta bawngban taw nga ai lam KIO hte ni nawn ai ni kaw na chye lu ai.
Ndai kalang KIO hte hkrum na Miwa salang wa gaw, CPPCC ginjaw party hpung shang salang langai rai nna, Shawoi hkrum shaga ai wa hta madang tsaw ai salang langai re lam chye lu ai.
Dai ni hkrum jahta ai Miwa Salang Wu Ken gaw lai wa sai ten, Germany mungdan a Miwa maigan hkringmang dakasa galaw wa ai salang rai nna, dai ning September shata hta sha, Miwa gumsan mungdan Beijin de bai du wa ai re lam sagawn chye lu ai.
Ndai kalang hkrum jahta bawngban ai hta KIO maga de na ningbaw kaba Dukaba Nban La, Ninggawn Amu madu kaba Salang kaba Kumhtat Hting Nan, KIC Ningbaw malai (1) Dukaba Sumlut Gun Maw, DGA lithkam Dukaba Lahpai Zau Raw hte Dukaba Hkun Nawng ni shang lawm ai re lam chye lu ai.
Wunpawng Mungdan Shalawt Hpyendap KIA maga Manmaw muklum kaba hpe laja lana htim shagrawt nga ai ten Miwa Asuya maga ya na zawn hkrum jahta bawng ban na matu saw shaga wa ai lam rai nga ai.
Dai ni hkrum jahta bawngban na lam hta madung hpa hte seng na hkrum jahta na re ai ngu hpe a tsawm tup hkrak rai n chye lu shi ai re.
