Woi Chyai Du Jawng gap hkrum ai 10 ning hpring lamang Rahkaing AA dap ni galaw
Wunpawng Mungdan Shalawt Hpyen Dap Du Shalat Jawng hta Myen hpyen dap laknak kaba gap bun ai majaw, Hpyen Du Jawng ma marai 23 asak si hkrum ai, dai ni 10 ning ladu hkrum sai re.
Lai wa sai 2014 ning November 19 ya shani hta, Hka Ya bum hta dung ai Myen hpyen dap ni kaw na Wai Chyai Bum Hpyen Du Shalat Jawng de 120 mm ngu maram lu ai laknak kaba gap bun ai majaw hpyen du jawng ma marai 23 asak si hkrum wa ai re.
Du Jawng ma ni si hkrum ai hta AA Rahkaing dap na hpyen du jawng ma marai 8 si hkrum wa ai rai nna, dai si hkrum ai lam hpe galoi mung malap na n re sha, matai bai htang sa mat na re nga Rahkaing AA dap kaw na dai ni November 19 ya shani hta ndau tawn ai re.
“ARaHka dap hku na November 19 ya shani du shagu ndai lam hpe malap n lu ai hte shaning shagu myitdum shagrau hkungga jaw ai lam ni hpe hpyen masa hta hkan nna, galaw taw nga ai re” lam tsun n dau da ai re.
Hpyen du jawng gap hkrum ai hta, Balawng TNLA dap na marai 11, AA Rahkaing dap na marai 8, ABSDF Jawng ma dap na marai 2, CNF Hkang dap na marai 2, yawng pawng marai 23 rai nga ai.
Woi Chyai Du Jawng gap hkrum ai dai ni na n htoi hta 10 ning hpring sai rai nna, ya na zawn myu hte mungdan a matu asak ap nawng mat wa ai ni a n tsa galoi mung n malap sadi dung nga na lam AA dap maga tsun n dau da ai re.
