Jinghpaw Mung the Sagaing Jarit na Myen hpyen dap shara hte SNA dap shara 3 hpe KIA htim gasat zing
Jinghpaw Mung hte Sagaing Jarit mayan na Myen hpyen dap hte Sam Hkyeng SNA ni a dap shara 3 hpe Wunpawng Mungdan Shanglawt Hpyen Dap KIA hte PDF pawng hpawm dap maga htim gasat zing madu la lu ai nga shawng lam magm gun ni kaw na chye lu ai.
Nawng Lut Ginwang Sezin mare, Sagaing hkran maga na Sam Hkyeng SNA hte Pyithutsit ni nga ai Shwe Twi dap shara, Yalati dap shara hte Tsai Pan dap shara ni hpe KIA hte pawng hpawm dap maga November 18 ya shani gasat zing la lu wa ai nga shawng lam magam gun langai KNG de ndai zawn tsun dan ai re.
“Ndai shara ni hpe anhte maga October 25 ya shani kaw na htim gasat hpang ai, mani gaw Shwe Twi dap shara hte Yalati dap shara lahkawng hpe lu zing ai, Tsai Pan dap shara hpe wang da ai na sai dai kata kaw gadai mung n nga na, yawng hprawng ma ai dai shara ni yawng hpe dai hpawt jasan kau lu sai nga,” tsun ai re.
Dai mayan na dap shara ni hpe KIA maga October 25 kaw na htim gasat hpang wa ai gaw, November praw 2 ya shani hta Gawng ngu kawng hte Pang Shee post dap shara ni hpe htim gasat zing madu la lu wa ai re.
Jinghpaw mung hte Sagaing jarit Sezin ginra na Myen hpyen dap hte Sam Hkyeng SNA dap ni hpe Wunpawng Mungdan Shanglawt Hpyendap KIA hte PDF pawng hpawm dap ni kaw na lai wa sai October shata 25 ya shani kaw na htim gasat hpang wa ai rai nna, bat lahkawng laman hta dai dai shara 3 hpe padang dip zing la lu wa ai rai nga ai.
KIA dap maga na htu shadut htim gasat nga ai shara ni gaw, Sagaing jarit Hummalin hte Sezin ginra ni hta rai nna dai shara ni hpe KIA dapba (9) hte Dapba (8) ni pawng hpawm nna htim gasat taw nga ai lam mung rai nga ai.
Majan ten laman hta Myen hpyen dap maga na nbungli hte shani shagu gap gasat wa ai lam a majaw KPDF dap maga na marai 2 hkrat sum wa nna, SNA dap maga na mung sum machyi lam law wa ai lam chye lu ai.
“Majan gaw tsawm ra laja ai ngu mai tsun ai. anhte maga na mung hkrat sum ai lam nga ai, Ya hte shani hta sha marai langai hkrat nna, mani sha mung langai hkrat ai, SNA dap maga na mung Si sum ai lam law ai, mani sha mung nbungli hte 2 lang wa gap ai nga,” shawng lam magam gun langai matut tsun dan wa ai re.
Ya KIA htim gasat da ai shara yawng hta Sam Hkyeng SNA hte Myen hpyen dap a lagaw lata tai ya taw ai Pyozawhti hpyen n gun 200 daram nga ai shara ni re lam chye lu ai.
Sezin Hummalin Shiga masa lam hte seng nna, Dukaba Naw Bu hpe san shaga yu ai rai tim, Dukaba maga Phone hta ai lam n nga wa ai re.
Hummalin hte Sezin lapran na Uruhka mayan na SNA dap shara ni hpe KIA dap maga lai wa sai shata 25 ya shani kaw na htim gasat hpang wa ai gaw, bat lahkawng laman hta dai shara mayan na dap shara yawng ngu na ram hpe htim gasat zing madu la lu wa sai re.
