Myen hpyen Nbungli hte Bom Jahkrat Bun Ai Majaw Mung Shawa Marai 3 Asak Si Sum Nna Marai 10 Hkala Hkrum
Mungmyit Sinli , Kutkai mare kaba hta Gumshem Myen hpyen dap Jet Fighter Nbungli hte Bom Jahkrat bun ai majaw Mung shawa marai 3 asak si sum nna marai 10 hkala hkrum ai lam ginra masha ni kaw na chye lu ai.
November 17 ya shana yup tung hkying 12 ten daram hta, Myen hpyen jet Fighter Nbungli hte Bom Jahkrat bun ai majaw, Kutkai Daw (4) na, Miwa Nawku jawng makau hta wa hkrat ang ai majaw, dai makau na nta 3 hten mat nna mung shawa si hkala lam law wa ai nga ginra masha langai KNG de tsun dan ai re.
“Mana yup tung hkying 12 aten daram hta nbungli kaw bom wa jahkrat bun ai. Bom kapaw ai nsen gaw Kutkai mare ting gara mat ai. Kutkai Daw (4), Hpunau Miwa Hkristan ni a Nawku jawng makau kaw bom wa hkrat kapaw ai majaw makau grupyin na nta 3 makmi makmwi htenza mat ai. Mung shawa gaw marai 3 asak si nna marai 9 hkala hkrum ai. Ya gaw hkala hkrum ai ni yawng hpe Ziwaka tsi gawk kaw sa da nna tsi tsi hkam la taw nga masai.” Nga tsun ai re.
Bom nsa a majaw Kutkai Mare Jinghpaw Wunpawng Hkalup hpung a Nawku Jawng hkuwat kaw na pat ni hkrat ga ai lam nga ai hpe matut na chye lu ai re.
Ya ten Kutkai mare buga hpung shagu na ramma ni jasan jaseng ai lam ni galaw taw nga sai re.
Myen hpyen dap ni kaw na, shan the tat sum kau da ai shara ni hpe nbungli bawm jahkring hkring sa jahkrat bun ai lam ni galaw taw nga ai re.
Kutkai mare gaw laiwa sai 1027 majan masing shawng lang hta TNLA hte MNDAA ni kasat zing madu la ai mare rai nna pranwan mare up hkang lit hpe TNLA/PSLF kaw na lit la nga ai mare re.
