Myitkyina Mandalay lam kaba hpe matut pat da nna, mawdaw kaji ni nam lam hku na lai taw nga
Myitkyina Mandalay lam kaba hpe Indaw majan a majaw, lahkawng maga dap na matut pat da ai majaw, hkawm sa hkawm wa matut yak hkak taw nga ai re.
Lai wa sai shata man 8 kaw na, KIA woi awn ai PDF pawng hpawm dap ni Indaw muklum hpe htim gasat hpang wa ai kaw na, Myitkyina Mandalay lam pat mat ai gaw, dai ni du hkra atsawm rai n hpaw shi ai majaw, Jinghpaw mung kata gunrai manu tsaw rawt ai the dumhprut ai lam ni ding yang byin nga ai re.
Shawoi lai taw nga ai mawdaw lam kaba hpe Myen hpyen dap hte PDF dap lahkawng maga matut pat da nna, nam lam, koi lam hku na n kau mawdaw ni lai taw nga ding yang re lam Mawdaw gate madu langai KNG de ndai zawn tsun ai re.
“Mawdaw lam kaba gaw hpaw da ai lam rai n nga shi ai, Maw Lu hpang kaw na hpaw da ai koi lam hku na lai ai, ya gaw Indaw makau Pin Way kaw hpaw da ai nam lam hku na lai ai, nam lam hku nga yang gaw mahkrai ni nga ai, dai mahkrai hkan gaw, mawdaw kaji ni sha mai lai ai, dai nam lam hku na mawdaw kaji ni gaw ding yang matut lai nga ai. rai tim jahkring hkring hpaw dat pat dat re.” nga tsun ai re.
Dai zawn nam koi lam hku na lai taw nga ai hpe Myen hpyen dap maga na bai hkum pat ai lam ni a majaw, hkrun lam hkawm mung shawa hte gunrai htaw mawdaw la ni yak hkak hkrum taw nga ai re.
Indaw muklum hpe lai wa sai August shata kaw na KIA woi awn ai PDF pawng hpawm dap maga htim gasat wa ai gaw, makau grup yin na dap ni law malawng hpe jasan kau lu sai rai tim, Indaw byuha dap kaba naw ngam taw nna,shani shagu, majan matut laja taw nga ding yang re.
Indaw majan laja taw nga ding yang re majaw, Myitkyina Mandalay lam kaba aloi the sha hpaw na masa n nga ai nga, ginra masha ni tsun maram da ai re.
