Nawng Lut Ginwang, Nawng Ing mare makau na, KIA dap ni nga ai Sa Nun Kung dap shara hpe Sam Hkyeng SNA dap ni kaw na November 10 ya jahpawt sa htim gap gasat wa nna, dai ni kaw na mung majan bai matut byin nga ai nga ginra masha ni tsun ai re.
November 10 ya shana hkying 8 daram kaw na laknak kaji kaba gap gasat hpang wa ai gaw hkying hkum mi ram ngoi ai hpang bai zim mat ai nga ginra masha langai KNG de ndai zawn tsun dan wa ai re.
“Lai wa sai Laban ya jahpawt kaw na gaw Nawng Ing Sa Nun Kung kaw mung ngoi hpang wa sai, Sam HKyeng SNA ni sa htim gasat wa ai hpang hkying hkum mi dang laknak kaji kaba ngoi na bai zim mat ai.” nga tsun dan wa ai re.
Ya ten Nawng Ing buga ginra masha ni yawng hprawng yen ma ai majaw, Nawng Ing mare na Jinghpaw lawk na dum nta ni yawng hten ayai ma sai nga matut tsun dan ai re.
Nawng Ing Buga ginra masha ni hpyen yen aten ladaw galu wa ai the rau lam shagu hta yak hkak hkrum taw nga ai majaw, garum ningtum hpung ni hpe myit mada nga ma ai re.
Nawng Ing mare kata hta, laga Myen Sam ni mai hkawm sa, mai galaw sha ai rai tim, Jinghpaw re ai ni gaw gara de mung pru hkawm n mai ai lam ginra masha wa ndai zawn matut tsun dan wa ai re.
“Sam Hkyeng dap ni kaw na shara shagu gate jahkrat da ai, Jinhpaw nga the rim sai, dai hku rim na gaw, magam dap de na ni rim da ai masha hte bai galai shaw la shangun ngun re majaw, anhte magam dap de na ni mung, ndai the seng na hpang kalang rai jang n galai ya lu sai nga ndau da ai, dai majaw si hkrung si htan ahkyak ai sha n rai yang hkawm sa ai lam ni n galaw na matu ndau da sai,” nga tsun ai re.
Nawng Ing Namawn ginra masha ni gaw lai wa sai June shata 24 ya shani kaw na Namawn mare lahta Nyawng Pin, Waylung, Chawng Wa, mare ni de majan laja wa ai majaw, mare masha yawng hprawng yen ra mat ai rai nna, ya nam de hprawng yen taw ai shata 5 hkawt na wa ai ten lam shagu hta yak hkak dut dang nga ai re.
Ya ten Nawng lut ginwang kata hta laga masha ni hkawm sa mai ai rai tim, Jinghpaw re ai ni n mai hkawm sa ai majaw grau nna, yak hkak ai re nga ginra mash ani tsun ai re.
Dai ginra ni hta dai ni kaw na majan bai byin nga ai rai tim, Phone Internet line mayak a majaw, majan masa lam hpe a tsawm tup hkrak rai n chye lu shi ai re.
