Laiza makau Lamai Yang mare nbungli bawm a majaw mung shawa marai 2 si hkrum

Myen hpyen dap Jet Fighter nbungli langai the dai hpawt manap hkying 1 daram hta, Laiza makau Lamai Yang mare kaw bawm wa jahkrat bun ai hta mung shawa marai 2 asak si hkrum wa ai lam ginra masha ni kaw na chye lu ai.

KIA dap maga Pangwa mare hpe htim shagrawt nga ai ten, Myen hpyen dap maga nbungli hte KIA ginjaw ginra makau Lamai Yang mare hta bawm wa jahkrat bun wa ai mung rai nga ai.

Myen hpyen nbungli hpe Miwa jarit maga  de na Wan Pala gap jahkrit ai lam ni mung nga wa ai lam Dukaba Naw Bu matut tsun ai re.

“Dai hpawt maga hkying 1 ten daram hta rai nga ai, Miwa hkran maga de na jarit shim lam a matu Wan pala gap ai lam ni nga ai,” nga tsun ai re.

Miwa hkran maga na Wan Pala the bai n htang gap bun wa ai majaw, dai nbungli kalang lata bai n htang mat ai lam ginra masha ni tsun ai re.

Myen hpyen nbungli bawm wa jahkrat bun ai majaw, asak (40) ning daram re, MHH Du Njung Awng the madu Jan Hpaugan Lu Ra yan asak si hkrum wa ai re.

Myen hpyen nbungli bawm langai gaw mung shawa dum n’ta hta nan wa hkrat kapaw ang nna, langai gaw n ta makau yang de wa hkrat kapaw ai re lam ginra masha langai n dai zawn tsun ai re.

“Nbungli bawm gaw lahkawng wa hkrat ai, langai gaw dai Njung nta ang ang kaw nan wa hkrat ai, langai wa gaw loi lai mat ai, majaw Lashi Lawt Naw nta makau wa hkrat ai, dai wa gaw masha hpa n ra ai, Miwa de na Wan pala gap ai majaw kun? Kalang lata bai n htang mat ai,” nga tsun ai re.

Lai wa sai 2023 ning October shata hta mung, Myen hpyen dap nbungli the Munglai Hkyet mare bawm wa jahkrat bun ai majaw, hpyen yen mung shawa marai 30 hkawt asak si hkrum wa nna, marai 60 hkawt hkala hkrum wa ai sai re.