Waimaw Kanpaiti lam kaba n tsa, Sin Chyai mare hta dap jung shara jahkrat tawn ai, Masat (1003) Jarit sin dap dung kaba a, shawng lam makawp dap shara 5 ram hpe KIA pawng hpawm dap maga mani October 17 ya shani lani mi laman htim gasat zing madu kau nna, dai hpawt manap dai shara ni hta dap jasan ai lam galaw nga ai nga, Dukaba Naw Bu tsun ai re.
Lu Pyi mare na, jarit sin dap hpe htim gasat zing madu ngut ai hpang, Kanpaiti lam kaba n tsa de bai gap gasat hkat wa ai gaw, Sin Chyai BGF dap hpe shim lam la ya nga ai shawng lam dap shara 5 daram hpe htim gasat ai nga Dukaba Naw Bu KNG shiga dap de tsun ai re.
“Lu Pyi hpe gasat zing kau ngut ai hpang, Pang Wa makau na Falu Shan nga ai dap shara hpe hpang jahtum zing ai re rai, ya mani gaw Kanpaiti lam maga de e Waw HKyung, Sin Chyai Dumbang Hka grup yin hkan na post 5 ram hpe gasat zing lu ai nga Social media hkan mu ai, shan hte hku na gaw a tsawm rai n shateng ya shi ai, dai hpawt du hkra gaw dap jasan ai lam ni galaw nga ai,” nga tsun dan ai re.
Ya ten du hkra Kanpaiti the, Pang Wa muklum ni hpe shang htim gasat ai lam ni rai n nga shi ai rai nna, makau grup yin hkan na dap shara ni hpe htim gasat taw nga ai ram sha naw re lam matut tsun ai re.
Mani gap gasat hkat ai shara gaw Sadung hte Kanpaiti lapran kaw rai nna, Kanpaiti lam kaba n tsa BGF dap shara hpe shim lam la ya taw nga ai dap shara re.
Ya ten dai shara ni de hpyen masa matut shaja hkat taw nga nna, Sin Chyai jarit sin dap kaba gaw, Kanpaiti hpaga gunrai ginlen dabang hpe madung shim lam la ya taw ai dap shara re.