Chihpwi, Pangwa ginra hta gap gasat hkat nga ai majan gaw, amyu sha shada gap gasat hkat ai majan n re lam Dukaba Naw Bu Tsun
Chihpwi, Pangwa ginra hta gap gasat hkat nga ai majan gaw, amyu sha shada gap gasat hkat ai majan n re sha Myen hpyen dap hpe lagaw lata tai ya taw nga ai Pyithutsit hte Jarit Sin Dap ni hpe gap gasat taw ai she re lam Dukaba Nhpang Naw Bu tsun ai re.
Wunpawng amyu sha ni yawng myit mada ra sharawng taw nga ai pangdung de du lu na matu, Gumshem Myen hpyen dap hpe asak matut galu hkra lagaw lata tai ya shakut nga ai Pyithutsit BGF ni hpe gasat shamyit taw nga ai lam re nga ndai zawn KNG de tsun dan wa ai re.
“Ya byin nga ai majan gaw, amyu sha shada gap gasat hkat ai majan n re, ndai aten hta gaw Myen mungdan a mung masa, sat lawat ni hpe chye lata ginhka la ra na ten re, tinang a mungchying mung shawa ni hpa hpe myit mada taw nga ai ngu hpe lata la chye let mung shawa yawng myit mada ra sharawng ai Pandung de lawan du lu hkra, yawng myit hkrum lata gindun let, Pangdung du hkra lawan jawm shakut ra na aten ladaw re, ndai ten Myen hpyen dap hpe madi shadaw ai lam ni galaw taw nga ai baw ten nre,” nga tsun ai re.
Rawt malan magam bungli Awng dang ai hpang, tinang amyu sha ni a matu, myit hkrum mangrum ai hte, mungdan a magam bungli lam ni hta, bai jawm shakut galaw sawa na re majaw, ya aten n dai rawt malan magam bungli lam hta yawng jawm shang lawm na matu, matut tsun da ai re.
Shaning 30 ning jan Zahkung Ting Ying hkan wa ni up madu nga ai, Chihpwi Saw Law mare kaba ni hpe KIA dap maga ndai September shata htum kaw htim gasat zing madu kau sai re.
Chihpwi hte Sawlaw mare ni hpe htim gasat zing madu kau ngut ai hte Zahkung Ting Ying hkan wa ni a dap daju shara Pangwa maga de hpyen man bai gyin mat wa ai gaw, ya ten dai makau grup yin hta laja lana bai gap gasat hkat taw nga ai re.
October 15 ya shani hta Pangwa hte ni dik Lu Pyi mare na Jarit sin dap kaba hpe KIA htim gasat zing madu kau lu wa ai re.
Lu Pyi mare na jarit sin dap hpe n htoi 5 ya hte yawng zep zi htim gasat zing madu kau wa ai re.
Ya htim gasat kau ai Lu Pyi mare BGF dap gaw, Pang Wa mare hpe shim lam la ya taw ai dap shara langai mung rai nga ai.
Matut na rai tim Zahkung Ting Ying woi awn ai BGF dap shara masum nga ai hta langai hpe gap gasat zing kau lu ai hpang Hpi Maw, Nazung Bawm hte Sin Chyai mare kaw naw nga ai re.
Lhovo, Lachid, Lisu amyusha baw sang ni hkrai nga ai ginra hta majan n kam shabyin ai majaw KIA maga na Datkasa dat let bawngban jahkrup wa ai rai tim, Zahkung Ting Ying maga na n hkap la wa ai majaw, ya na zawn majan shabyin wa ra ai re lam ginra masha langai ndai zawn matut tsun dan wa ai re.
“KIA/KIO maga na gaw mai kaja dik ai ladat hte jahkrup bawng ban wa ai hpe, dai ginra na ni n hkap la ai majaw, laknak hte gasat hkat wa ai re ga rai nga ai,” nga tsun ai re.
Dai ginra hta byin taw nga ai majan masa lam ni hte seng nna, shada lahkawng maga prinyem hkra jahkrup bawngban la na hpe ginra madu ni ra sharawng nga ai re.
