Sam Hkyeng SNA dap ni Namawn mare Pru Shang lam hta laja lana san jep nna, Hpyen Lahkawn nga

Nawng Lut Ginwang, Na Mawn mare pru shang lam hta, Sam Hkyeng SNA Dap ni kaw na laja lana san jep ai lam galaw nga nna, hpyen rim lahkawn ai lam ni mung galaw taw nga ai nga, ginra masha ni tsun ai re.

October 5 ya shani hta mung, Na Mawn mare numshang hta ramma marai 4 hpe rim woi mat nna, shata mi laman hta ramma marai 8 rim hkrum wa ai nga ginra masha langai KNG de tsun dan wa ai re.

“Ya hte shani sha ramma marai 4 hpe rim woi da ma ai,  dat ya sai kun? ndat ya ai kun? n chye ai, nga tsun ai re.

Lai wa sai July praw 5 ya shani kaw na SNA hte Myen hpyen dap ni pawng hpawm nna, Namawn mare numshang shara mi, mare pru wa ai lam hta shara mi, KBC Nawku jawng makau hta shara mi, hpungkyi jawng makau hta shara mi rai dap jung shara jahkrat na nga taw ai re.

Sam hkyeng SNA dap ni kaw na hpyen lahkawn la nna, n kau hpe gumhpraw hte bai shaw la shangun ai lam ni galaw taw nga ai zawn, nkau hpe hpyen wunkat jaw taw sai nga tsun ai re.

“ya masat yan langai hpyen wunkat gaw ngut wa sai, marai 200 ram hpe jaw taw ai, dai hta asak 50 ning jan sai asak kaba ai ni mung lawm ai” nga matut tsun dan wa ai re.

Ndai laman gaw, Hopin – Indaw- Hpakant lam kaba n tsa ding yang hpyen lahkawn taw nga nna, ndai laman hta sha hkrun lam hkawm mung shawa marai 50 ram hpe rim lahkawn wa ai nga tsun ai re.

Ya na zawn hkrun lam hkawm mung shawa ni hpe laja lana san jep nna, n tsen n hten ai ni hpe Phone ni du hkra yawng sawk jep ai lam chye lu ai.

Dai ginra na mung shawa law malawng gaw, lai wa sai June shata hta Chaung Wa, Way Lung maga de gap gasat hkat wa ai kaw na yawng hprawng yen ma ai rai nga ai.