Kanpaiti ginra hta Pyithutsit dap ni n’ta langai hpyenla marai langai n galaw n mai, laja lana hpyen rim lahkawn nga
Jinghpaw mung Miwa hpaga gunrai ginlen dabang, Kanpaiti mare hta Pyithutsit ni kaw na n ta langai hpyen la langai n galaw n mai, laja lana hpyen lahkawn nga ai nga ginra masha ni tsun ai re.
September 29 ya shani, Chihpwi hte Saw Law mare kaba ni hpe KIA htim gasat zing madu kau ai hpang, Kanpaiti mare kata hta nta langai na marai langai n galaw n mai ladat hte hpyen rim lahkawn taw nga ai nga ginra masha langai KNG shiga dap de tsun dan ai re.
“N’ta langai na marai langai n galaw n mai ladat hte, dingla rai rai, dinggai rai rai, Num La n lata ai yawng rim lahkawn taw nga ai, Num kasha ni hpe mung grai law rim lahkawn da ai,” nga tsun ai.
Dai ginra hta lai wa sai shata kaw na, nta langai n galaw n mai shaga taw nna, n sa wa ai ni hpe n ta di di hkan shaga woi la taw nga ai lam matut chye lu ai.
Ginra masha ni hpe sha n ga, lawu ga na bungli wa galaw ai Myen ni hpe mung rim lahkawn la taw nga ai re.
“Shawoi gaw Company mawdaw gau ai ni hpe n lahkawn ai, Ndai kalang gaw yawng lahkawn ai, n kau hpe gaw gumhpraw hte bai shaw la shangun ai” law malawng gaw gumhpraw n lu ai re nga yang n lawt ma ai,” nga tsun ai re.
PYithutsit hpyen hpung ni kaw ni Hpalap Seng, Lusha seng, manam jarawp, shara shagu hkan rim lahkawn nga nna,Mawdaw la n kau hpe gaw yu na rim lahkawn ai lam galaw nga ai majaw, bungli wa galaw sha nga ai ni mung yak hkak hkrum nga ai re.
Dai ginra hta madung hpyen rim lahkawn nga ai gaw, Lagwi Bawm Lang woi awn ai Pyithutsit hpyen hpung ni re lam chye lu ai.
Ya na zawn Pyithutsit dap ni kaw na laja lana hpyen rim lahkawn nga ai majaw ginra masha ni galaw lu galaw sha lam ni yak hkak taw nga ai re.
Ya ten Kanpaiti ginra hta Myen mung maga na, Langu si htaw mawdaw ni ding yang shang taw nga nna, Miwa hkran maga na Jinghpaw mung de Jaksau hte laga gunrai n kau ding yang shang taw nga ai re.
Lai wa sai June shata 10 ya shani hta, Sadung mare hpe KIA htim gasat zing madu kau ai hpang, Kanpaiti mawdaw lam kaba yawng hpe KIA up madu da sai re.
