Jahtu Zup Mare hta Pyithutsit dap ni kaw na hpyen n’gun 300 ram hte, hpyen hprim shamu shamawt nga

Jahtu Zup mare hte Wara Zup mare lapran na Min Zey Thant woi awn ai Pyithutsit hpung ni hpyen n-gun 300 ram hte hpyen hprim madun shamu shamawt ai lam galaw taw nga ai nga, ginra masha ni tsun ai re.

Jahtu Zup Sanpya mare na Pyithutsit dap kata hta, shawoi na hta hpyen n-gun grau shalaw nna, hpyen hprim madun, hpyen shaman shakyang  taw nga ai, bat 2 daram rai wa sai nga, Jahtu Zup ginra masha langai KNG shiga dap de tsun dan wa ai re.

“Bat lahkawng ram rai wa sai, num ni mung lawm, la ni mung lawm rai, jahpawt shagu pai hkra pai marawn nna, hpyen shaman taw nga ai, dai zawn hpyen shaman ai n sen shawoi galoi nna yu ai, ya n dai laman she adan aleng mu ga wa ai, maram yu yang shan hte hpyen n’gun hpe madun mayu na re ngu maram lu ai. masha n’gun gaw 300 ram re,” nga tsun dan ai re.

Min Zay Thant pyithutsit dap hta shawoi hpyen num ni nga ai hpe n mu ga ai rai tim, n dai hpang de Num ni hpe mung hpyen hpaji sharin ya wa ai masa re lam matut tsun dan wa ai re.

Ya ten dai Pyithutsit dap ni gaw, wuhpung 5, 6 ram garan nna, jahpawt shagu mare kata de du hkra kagat hkawm dan taw nga ai majaw, mung shawa n kau hkrit tsang taw nga ai re.

Jahtu Zup ginra hta majan zim taw ai laning mi jan sai rai nna, ya na zawn Pyithutsit dap maga hpyen shamu shamawt wa ai majaw, majan bai byin wa na hpe ginra masha ni myit tsang taw nga ai lam tsun ai re.

Jahtuzup mare grup yin hta Pyithutsit dap ni kaw na, shawoi na hta grau, Wut shakum ni hte banger gadut ni shagreng da taw ai lam ginra masha ni matut tsun dan ai re.

Dai Min Zey Thant Pyithutsit dap ni kaw na Jahtu Zup Kahtawlik Kyuhpyi bum hta mung laknak kaba shadun da ai lam chye lu ai.

Pyithutsit dap ni kaw na, Warazup hte Jahtu Zup mare htum hkra hkra Drone shapyen nna, shana shagu kinyu gawam hkawm taw ai lam, ginra masha ni matut tsun dan ai re.

Jahtu Zup mare hta lai wa sai 2023 ning July shata hta KIA dap maga hpyen n gun kaba hte sa htim gap gasat wa yu sai re.

2024 ning KIA a htim shagrawt majan hta, Hugawng Lido lam kaba mayan de hpa majan byin ai lam mung rai n nga shi ai re.