Lai wa sai bat hta Malihka kaba wa ai majaw, Malihku hka kau mayan hta nga ai mung shawa dum n’ta 200 jan hten hkrum mat ai majaw, ya ten dai hka hpyen hkrum ai mung shawa ni garum ningtum ra taw nga ai re.
Malihka tung wa ai majaw mali hka kau na mare ni rai nga ai, Hpung Ing Yang, N-Jip, Nsawp, Tayang Zup, Layen Bumrun, Ndup Yang, Nhtang Zup mare hkan na mung shawa dum n ta law law mali hka wa adawt nna, ga gyi ai hta gyi lawm mat ai re.
Dai gyi ru ai hta dum nta 200 hkawt lawm mat nna, dai ni hpe ya hkyak hkyak gan rawng machyu shingbyi mai na dum nta gan gaw gap na garum ningtum ra nga ai lam Malihku Nhtang Zup Mare na Salang langai KNG shiga de tsun dan wa ai re.
“Ya gaw dum n’ta yawng hten mat ai ni hpe gan rawng mai na mu ga ginsum gap la na garum ningtum ra taw nga ai, n kau gaw htingbut htingra ni du hkra hka yawng adawt sha kau ya ma sai, dai ni na matu shara ningnan mung tam ra ai, ya gaw hpa n lu mat sai majaw lu sha hte muga ginsum gaw gap na ra ahkyak taw nga ai,” nga tsun ai.
Ya ten Tanghpre hte Tiyang zup lapran mawdaw lam shara 10 jan hta ga gyi nna, Myitkyina Putao sha n ga, Myitkyina Malihka hku de lung ai lam ni yawng pat mat sai re.
Tanghpre hte Tayang Zup lapran shara 10 jan mawdaw lam gyi ru mat ai sha n ga, Masum Zup lahta, Hpung Chyan hte Sumprabum lapran, Sumprabum hte Mai Htawng lapran, ni hta ga gyi ru taw ai sha n ga, Tang Ja mahkrai mung lai n mai hkra hten taw sai nga tsun ai re.
Ya na zawn Malihka lam hte Putao lam kaba pat mat ai majaw, malihka hku hte Putao ginra ni hta gunrai manu ni bai matut tsaw rawt taw nga ai lam chye lu ai.
