Mogaung Hka hte Mungnyang hka kaba wa ai majaw, Mogaung mare hte makau grup yin na mare ni yawng hka hpyen hkrum taw nga ai re.
July praw 2 ya shana maga de kaw na hka kaba hpang wa ai gaw, dai hpawt manap tsang ra ai shadang hta du nga sai lam Mogaung ginra masha langai KNG de tsun dan wa ai re.
“Myo ting hka lim taw nga ai, garum kahtau hpung ni mung grai ra ahkyak taw nga ai, gade daram kaba ai ngu gaw mawdaw lam sha ngam mat nna, ndai hkran htaw ra hkran yawng hka lim taw nga sai, madung gaw shat lu sha hta jakli ni grai ra taw nga ai,” nga tsun ai.
Mogaung mare kaba hta, hkye mawoi garum ningtum jaw lu na matu lam tam shakut taw nga nna, n kau hpe htawt sit shara jahkrat da lu sai zawn, n kau mi hpe mung matut sa woi hkye shaw la ra taw nga ai nga, matut tsun dan wa ai re.
Ya ten Mogaung mawdaw lam kaba n tsa sha ngam nna, laga Myo Oo, Zekung, Kotan, Kyun Taw, Phochit Kung, Buda, Nawngkai Taw, shara ni hta hka lim taw nga sai re.
Ya ten Mogaung mare kaba hta hka tsaw de tsang ra shadang hta pe 4 jan tsaw rawt taw nga sai rai nna, matut na naw kaba wa mai ai majaw, lamu ga nem ai shara de na mung shawa ni yawng lawan htawt sit na matu, seng ang ai asuya kaw na hkan ndau ai lam ni galaw taw nga ai re.
Hka hpyen hkrum nga ai Mogaung ginra masha ni hku na ya ten hkyak hkyak lu hka san hte malu masha lam ni ra gadawn nga ai re.
Matut na rai tim Mogaung hka hte Mungnyang hka naw kaba rawt taw nga ai majaw, ndai hta grau na naw tsaw rawt jat na re lam, ginra masha ni tsun maram da ai re.
Lai wa sai 2015 ning hta dai ning na daram hka n kaba ai rai tim, sum machyi ai lam ni law wa ai majaw, dai ning gaw shawoi shaning na hta grau kaba taw ai majaw, arung arai sum machyi ai lam ni dai ning laman grau law na masa nga ai nga, ginra masha ni tsun ai re.
Mogaung mare gaw, lamu ga nyem ai shara re hte maren, hka shi masum wa zup ai mare kaba re majaw, shaning shagu hka hpyen hkrum ai mare kahtawng mung rai nga ai.
