Majan Byin Wa Ai Hte Rau Lashio Mare Pru Shang Lam Yawng Pat
Lam Lapran Mawdaw Tsa Lam Pat Hkrum Nga
Lahta Sammung, Lashio Ti Paw lam hte Muse Lashio lam kaba ntsa gunrai htaw mawdaw hte hkrun lam hkawm mawdaw tsa kaba pat hkrum taw nga ai lam chye lu ai.
July praw 2 ya shana kaw na Lashio mare kaba hta majan bai byin wa ai majaw, lam lapran ya na zawn mung shawa ni pat hkrum wa ai re lam tsun ai re.
Lam lapran du nga ai ten majan byin wa ai majaw, mawdaw la n kau lam n tsa mawdaw tawn kau da nna, tinang man ang ai shara ni de hprawng yen ai ni mung nga ai re hpe chye lu ai.
Lashio mare kaba grup grup na mawdaw lam kaba hte Mahkrai ni yawng hpe lak nak lang wuhpung lahkawng maga na dan di da ai majaw, hkrun lam hkawm mung shawa ni grau yak hkak hkrum taw nga ai re.
Majan rai n byin shi ai ten Dan Yang lam langai sha hku sai rai tim, dai hpawt majan byin ai kaw na bai kapaw di kau sai majaw mawdaw lam n hku mat sai nga Lashio ginra masha langai KNG de tsun ai re.
Ya ten Lashio mare kaba makau grup yin hta majan gap gasat hkat taw nga ai majaw, Lashio nbungli pa hpe dai hpawt kaw na aten masat pat kau sai re.
Lai wa sai 1027 majan ten hta mung nbungli pa hpe aten galu pat kau nna, lai wa sai March shata kaw na sha bai hpaw wa ai gaw, ya kalang bai pat kau ra ai rai nga ai.
Lahta sam mung ginra hta nbungli pa dai langai sha nga ai rai nna, dai n bungli pa makau hta Sinpraw Dingdung Myen Hpyen dap daju nga ai shara mung rai nga ai.
Kokang dap ni kaw na Myen hpyen dap hte myit hkrum ga sadi tawn ai lam hpe tawt lai nna, Lashio mare kaba hpe bai htim gasat wa ai majaw, Myen hpyen dap kaw na nbungli hte dai ginra na de nbungli hte bawm wa jahkrat na hpe tsang ai majaw, hpaji jawng ni hpe pat da shangun sai re.
