Ndai laman Marang htu kaba ai a majaw, Chi Hpwi Lam kaba hta ga gyi kaput mat nna, Mawdaw lai n mai lam pat taw nga ai nga ginra masha ni tsun ai re.
June 30 ya shani kaw na, marang n hkring n sa htu kaba wa ai majaw, Mali hte Nmai Hka lahkawng yan tung kaba wa nna, maw daw lam kaba ni hta ga gyi kaput ma nna, mawdaw lai n mai mat sai nga, ginra masha ni KNG shiga dap de tsun dan wa ai re.
“Chihpwi hte Nan Oo lapran kaw lam gyi kaput taw nga ai tsawm ra sawng ai, ndai laman marang grai kaba ai gaw, nkau shara hta lam nan gyi mat ai nkau shara hta bum gyi kaput mat ai, dai majaw mawdaw lai na matu yak mat sai,” nga tsun dan ai re.
Ga gyi kaput mat ai majaw, mawdaw lam n hkrang mat nna, Chihpwi ginra masha ni lam shagu hta yak hkak hkrum taw nga ai nga matut tsun dan wa ai re.
Ya ten dai lam lapran hta mawdaw lam gyi kaput taw nga ai sha n-ga, wan shadaw ni mung galau hten jawng taw nga ai majaw, Chihpwi mare hta wan n lu ai nhtoi 3 ya rai wa sai lam chye lu ai.
Chihpwi mare kaba hta ya ten CDMA Phone hta lai nna, laga phone line yawng hten taw nga ai zawn, Myihprap wan mung n lu na yak hkak hkrum taw nga ai re.
