Putao Du Jak Sau Ni Hpe Hpaga La Ni Masat Da Ai Manu Hta Jan Hkra Jaw Mari La Nna, Gat Lawk De Manu Hpu Hpu Hte Bai Dut Shabra Nga.
Myitkyina kaw na Putao de htaw du da sai jak sau Pepa mi hpe Sen 18 hte dut na matu seng ang ai asuya ni kaw na masat da ai rai tim, gumhpraw lu ai hpaga la ni kaw na, masat da ai kaw na jan hkra manu jahpu jaw na mari la kau ai majaw, ginra masha ni matut yak hkak taw nga ai lam ginra masha ni kaw na chye lu ai.
Putao mare kaba de June 19 ya shani shawng ning nan lang jak sau pepa 300 du shang wa ai hpe, sau pepa mi sen 18 hte dut na matu seng ang ai ni kaw na masat da ai rai tim, gumhpraw lu ai hpaga la na kaw sau sau pepa mi sen 20 hte 25 lapran hte mari la kau ai majaw, ginra masha ni n lu mari lang shi taw ai majaw ginra masha ni yak hkak taw nga ai nga, Putao ginra na mung shawa langai KNG shiga dap de tsun dan ai re.
“Kaja nan mung shawa ni kaw du ai gaw htam masum na htam mi daram pyi n du wa ai, dai jak sau gaw yak hkak taw nga ai Putao mung shawa ni a matu bang dat ai rai nga ai, rai tim kaja Putao bai du yang gaw gumhpraw lu ai ni masat da ai manu jahpu jan hkra hte hkap mari la kau ai, kaja wa ta tut hkauhting hkauna galaw ai mung shawa ni a lata de gaw kaji sha du wa ai, dai hku gaw n byin ging ai,” nga tsun dan ai re.
Putao ginra masha ni jak sau sa mari na rai yang hkauna lamu ga ပြေစာ madun nna, mari la ra taw ai rai nna, hkau na lamu ga e ka mi hta jak sau tau masum sha dut jaw taw nga ai lam matut tsun dan wa ai re.
Jam jau taw nga ai Putao ginra masha ni a mying hte dai jak sau ni hpe htaw lung wa ai rai tim, ya kaja ta tut hta hkauna galaw ai mung shawa ni a lata hta kachyi sha du wa ai majaw, ginra masha ni matut yak hkak hkrum taw nga ai lam chye lu ai.
Shata masum jan pat da ai Myitkyina Putao lam kaba hpe lai wa sai June 19 ya shana maga hta wuhpung wuhpawng langai kaw na shalun dat ai jak sau pe pa 300 gaw, Putao de shawng ning nan du shang wa ai rai nga ai.
Ya na zawn yak hkak taw nga ai Putao ginra masha ni a matu bang dat ai jak sau ni hpe gumhpraw lu ai lauban ni hte ja htu lauban n kau gumhpraw manu law law jaw nna, mari la kau ai majaw, ginra masha ni hta matut yak hkak taw nga ai rai nga ai.
