Waimaw Hkanna Buga Nawku Jawng Hpe Myen Hpyen dap Drone hte Kapaw Jahten
Waimaw Ginwang, Hkanan buga, Lamyang hpung lawk na Nawku jawng hpe Myen hpyen dap ni Drone hte wa gap bun ai majaw, nawku jawng yawng hten mat ai re lam chye lu ai.
June 10 ya shana maga hkying 3 chyen aten Myen hpyen dap maga de na yaw shada lam nga nga hte dai nawku jawng hpe wa gap jahten ai re nga, dai ginra na mung shawa ni tsun ai re.
“Dai mayan hta hpa majan mung byin ai n re, dai shara hpe drone hte wa gap na lam mung n nga ai, hpa hpyen mung n nga ai kaw drone hte wa gap ai ngu gaw, yaw shada lam nga nga hte wa gap jahten ai re. laknak kaba gap shadam na wa hkrat ai nga yang gaw naw re, ya gaw drone hte ngu gaw da sang wa gap ai ga rai nga ai,” nga tsun ai.
Dai jahpawt hta Tangbau mare makau hta Myen hpyen dap ni shamu shamawt hkawm wa ai hpe KIA dap maga hkap shingla gasat ai kaw na, aten gadum laman gap gasat hkat ai lam nga wa ai re.
Dai gap gasat hkat wa ai shara gaw, ya gap jahten hkrum ai Nawku jawng hte tsawm ra naw tsan ai lam chye lu ai.
Ang katut jahkring gap gasat hkat wa ai hpang kaw na Myen hpyen dap ni laknak kaba hte dai makau grup yin de gap shadam bun wa ai re.
Dai mayan na mung mare masha ni gaw, lai wa sai shata kaw na majan byin wa ai majaw, tinang man ang ai shara ni de hprawng yen taw nga nna, mung shawa gadai mung n nga sai mare kahtawng re lam chye lu ai.
Lai wa sai May 31 ya shana hta mung Myen hpyen dap kaw na gap dat ai laknak kaba si Hkanan buga hpung up sara nta hta wa hkrat ang ai majaw, hpung up sara nta yawng hten za hkrum wa sai re.
Ya ten Waimaw makau grup yin hta Myen hpyen dap hte KIA dap lapran hpyen masa shaja hkat ai lam nga taw nna, Myen hpyen dap maga na laknak kaba hte shana shagu makau grup yin ni de gap shadam bun taw nga ai re.
