Hpyen masa shaja hkat taw nga ai majaw, Waimaw ginra masha ni dai ning laman hkauna galaw lu na matu yak hkak taw nga ai re.
Jinghpaw mung hta Mam law malawng hkai shapraw nga ai Waimaw ginwang kata hta majan n hpan lam a majaw, ginra masha yawng hpyen yen yen ra mat nna, hkauna galaw lu na masa n nga mat sai majaw, du na shaning ni hta n-gu yak hkak wa na masa nga ai lam, dai ginra na mung mare masha ni tsun ai re.
“Dai ning gaw hkauna n lu galaw sai re majaw, du na shaning hpa sha na nga ra na kun? hkau na shang ten yawng hpyen yen yen hkawm taw nga ai, kaning rai ai baw kun n chye sai” nga Mukchyik ginra masha langai KNG de tsun ai re.
Lai wa sai March 18 ya shani kaw na, Waimaw Shwenyaung Pin hte laga shara ni hta KIA dap kaw na htim gasat shang wa ai majaw, Waimaw mare kaba hte hpawn makau grup yin na mare kahtawng 20 jan na mung shawa ni tinang man ang ai shara ni de hprawng yen ma ai rai nga ai.
Majan nhpan lam a majaw, mung shawa shim lum lam n nga mat nna, dai ning hkau na galaw ai masha n nga ai daram rai mat sai lam chye lu ai.
Ndai laman dai ginra hta majan byin ai lam n nga ai rai tim, Waimaw Myen hpyen dap wang kata na laknak kaba ni hte shana ting ting gap shadam bun taw nga ai re.
